Gizartea
''Egun on Euskadi''
70 urtetik gorako gehienek baietz esan diote gripearen txertoa eta covidaren hirugarren dosia batera hartzeari
Naiara Ballesteros | EITB Media
Gotzone Sagardui Osasun sailburuak azaldu duenez, atzerapausoa eman da pandemiaren bilakaeran "gora egin baitu", eta hori "kezkatzekoa da, horrenbeste lan egin ondoren".
Albisteak (3)
Gripearen txertoa eskatu duten 70 urtetik gorako pertsona gehienek eskatu dute covid-19aren aurkako hirugarren dosia ere hartzea, Gotzone Sagardui Osasun sailburuak asteazken honetan ETB1eko "Egun on Euskadi" saioan azaldu duenez.
"Gripearen aurkako txertoa eta covid-19aren kontrako hirugarren dosia batera hartzeko aukera eskaini zaien 70 urtetik gorako pertsona gehienek baietz esan dute orain arte", esan du sailburuak.
Bestalde, gripearen aurkako txertaketa kanpainaren harira, "ondo" doala esan du; izan ere, 97.000 biztanlek hartu dute hitzordua jada, 44.000 txerto inguru jarri dituzte eta "zifrek gora egingo dute kanpaina aurrera doan heinean".
Pandemiaren bilakaera, berriz, "ez doa bide onetik". Joerak gora egin duela esan du Sagarduik, eta "guztiok horrenbeste lan egin ondoren, kezkatzekoa da", gaurko datuen arabera, 100.000 biztanleko 66 kasukoa baita intzidentzia-tasa metatua, eta kezkagarriena oinarrizko birsorkuntza tasa 1,25ekoa dela esan du.
Horrenbestez, zuhurtzia eskatu du beste behin, "pandemia ez delako bukatu". Ildo horretan, erlaxatu egin garela eta babes neurriak betetzen jarraitu behar dugula nabarmendu du.
Covid-19aren kontrako txertoa 12 urtez azpikoentzat
12 urtetik beherakoentzat txertoa noiz iritsiko den galdetuta, Sagarduik esan du farmazia-konpainiak oraindik beren probak aurkezten ari direla Sendagaien Europako Agentzian, eta "zain" daudela; beraz, emaitzen araberakoa izango da epe hori.
"Sendagaien Europako Agentziaren gomendioak jarraituko ditugu, eta hirugarrena eman behar bada, Osakidetza prest egongo da horretarako", azpimarratu du.
Hirugarren dosia gizarte osoari oro har zabaltzeko aukeraren harira, adituek esaten dutenaren arabera arituko direla esan du Sagarduik, betiere, Sendagaien Europako Agentziak eta Osasun Publikoko Batzordearen irizpideei jarraituz.
Bularreko minbizia
Osakidetzak minbizia tratatzeko eskuratu berri duen protoi bidezko erradioterapia ekipamenduaren harira, Sagarduik adierazi du tratamendu zehatzagoa eskaintzea ahalbidetzen duen makina dela, "tratatu nahi diren zelulengan zuzenean eraginez, eta inguruan kalte gutxiago sortuz".
Amancio Ortega Fundazioaren dohaintzaren ondorioz eskuratuko makinagatik galdetuta, sailburuak azpiegiturak eguneratzen eta tresna horiek modernoagoak izan daitezen inbertsioak egin behar direla esan, eta "hori aukera oso ona da", azpimarratu du.
Bestalde, Osakidetzak osasun sistema humanizatzeko dituen planen harira galdetuta, esan du lan bereziena pertsonen osasuna ahalik eta modu onenean zaintzea dela, "eta hori ez da aldatu, pandemiarekin areagotu da".
Osasun mentalaz galdetuta, "Osakidetzatik ez gara hori orain begiratzen hasi; pandemia hasi zenetik oso gertutik jarraitu dugun gai bat izan da", azaldu du.
Bestalde, pandemiagatik osasun sisteman atzeratutako probak dagozkien egutegietara itzultzen doazela azpimarratu du, eta pandemiaren egoerak hobera eginez gero, plangintza bere ohiko martxa berreskuratzen joango dela iragarri du.
