Gizartea
Koronabirusa
Hildako bat eta 155 positibo berri Nafarroan
EITB Media
Hala ere, intzidentzia metatuak beheranzko joerari eutsi dio, 100.000 biztanleko 388 kasu izan baitira, aurreko egunean baino 20 puntu gutxiago.
-
Sanitarioak txertoak jartzen. Argazkia: EFE.
Nafarroan hautemandako koronabirus kasuek gora egin dute azkenengo orduetan. Covid-19ak jotako 155 kutsatu atzeman dituzte, eta 89 urteko hildako bat. Aurreko egunean baino 18 positibo gehiago dira; ostegunean 137 kasu baieztatu zituzten, eta hildako bi.
Horrela, azken asteko beheranzko joera eten da behin-behinean: ostegunean 137 kasu baieztatu zituzten, 147 asteazkenean, 152 asteartean eta 151 astelehenean. Hala ere, azken 14 egunetako intzidentzia metatuak beheranzko joerari eutsi dio, eta 100.000 biztanleko 388 kasutan kokatu da ostiralean, Osasun Ministerioaren arabera.
Atzoko egunean zehar, 7 lagun ospitaleratu zituzten, horietako 4 ZIUn. Dagoeneko 1.213 hildako utzi ditu pandemiak Foru Erkidegoan.
Ospitaleetako presioari dagokionez, 93 eri daude ospitaleratuta, horietako 28 ZIUn.
Udalerriei eta osasun-eremuei begiratuta, Tuterak atzeman ditu kasu gehien, 10 kutsaturekin; ondoren Lizarra eta Iruñeako Arrosadia daude, seina kasurekin, eta baita Arrotxapea eta Iturrama, bost positiborekin.
