Afganiar emakumeen aldeko manifestazioak izango dira arratsaldean Bilbon, Donostian eta Iruñean

Euskal Elkartasun Feminista elkarteak mobilizazioak deitu ditu Bilbon, Donostian eta Iruñean arratsalderako, talibanek Afganistan hartu dutela eta setioak afganiar emakumeak babesik gabe utziko dituela salatzeko. Talde feministak sare sozialetan adierazi duenez, azken egunotan, "historian zehar lortu dituzten eskubideak" galdu dituzte afganiar emakumeek.

Elkartearen aburuz, Europar Batasunak ez du neurri eraginkorrik hartu estremisten botere hartzea geldiarazteko eta Afganistango herritarrei lurraldearen kontrola itzultzeko.

Hala, nazioartearen "pasibotasuna" agerian utzita, Hego Euskal Herriko talde feministak antolatu egin dira eta krisi humanitario zein emergentzia feminista egoera baten aurrean gaudela salatu dute.

Protestetan, besteak beste, hauek aldarrikatuko dituzte: errefuxiatuei asiloa ematea, afganiar familiak elkartzeko tramiteak arintzea, emakumeentzako eta neskatoentzako korridore seguruak sortzea eta Espainiako Gobernuak nazioartea presionatzeko ahalegina egitea.

Aipatutako eskakizunak aintzat hartu ez eta giza eskubideak bermatu ezean, Euskal Elkartasun Feministak esan du "emakume gehiago hil, bortxatu eta esklabo bihurtuko" dituztela.

Abuztuaren 15ean, talibanak Kabulen sartu ziren Afganistango gobernua erretiratzera behartuz. Egoera horrek babesik gabe uzten ditu milioika emakume historian zehar lortu dituzten eskubideak galduz. Krisi humanitarioaz eta larrialdi feministaz ari gara. #FreeAfghanistanWomen pic.twitter.com/EHlSUFItSI

— Euskal Elkartasun Feminista (@EEFeminista) August 17, 2021

Mobilizazioak ostiral honetan

Bilbon, Moyua Plazan bilduko dira manifestariak, Espainiako Gobernuaren Ordezkariordetzaren egoitzaren aurrean, 20:00etan.

Gipuzkoako hiriburuan, Boulevardean izango da protesta, ordu berean.

Iruñeko manifestazioa, berriz, Udaletxe Plazan egindo dute, hor ere, 20:00etan hasita.