Gizartea
Koronabirusa
383era jaitsi dira kutsatzeak Nafarroan
EITB Media
Jaitsi egin dira apur bat Nafarroan zenbatutako covid-19 kasuak, duela astebeteko 447ko eta duela bi asteko 622ko kopurutik, orduan izan zen azken olatu honen puntu gorena. Positibotasuna % 13,9an mantendu da.
-
Nafarroako ospitaleko ZIUa. Argazkia: EFE.
Apur bat jaitsi dira Nafarroan zenbatutako covid-19 kasuak azken orduotan, 383 kasu hauteman baitituzte, Nafarroako Gobernuak emandako datuen arabera. Bezperan 404 kasu izan ziren, 400 kasutik gora beraz. Duela 7 egun 447 kasu izan ziren eta duela 14 egun goia jo zuen olatuak, 622 kasurekin.
Atzo 2752 test egin ziren eta positibotasuna ez da aldatu bezperako datuekin alderatuta, % 13,9an mantendu da.
Lizarran zenbatu dira kasu gehien 20, Arrotxapean 15, eta Txantrean eta Tutera ekialdean 12.
17 pertsona positibo ospitaleratu behar izan dituzte azken 24 orduetan, eta 128 ospitaleratu daude gaur egun Nafarroan, horietatik 21 ZIUn, aurreko egunean baino bi gehiago.
Gainera, covid-19ak eragindako beste heriotza baten berri eman dute: 1200 pertsona hil dira guztira koronabirusagatik Nafarroan pandemia hasi zenetik.
