Gizartea
Koronabirusa
Lehendakariak ez du baztertzen murrizketa gehiago ezartzea pandemia geldiarazteko
EITB Media
Egoerak okerrera egin duela-eta, lehendakariak esan du LABIren batzorde zientifiko-teknikoak proposa ditzakeen neurrien zain dagoela, egoki iritzitako erabakiak hartzeko.
Koronabirusak kutsatutakoen gorakada larriaren aurrean, Iñigo Urkullu lehendakariak esan du litekeena dela LABIko aholku-batzordeak, bihar bilduko denak, pandemia geldiarazteko neurri gehiago ezartzea erabakitzea. Horretarako, baina, batzorde zientifiko-teknikoak proposatutakoaren zain dagoela gaineratu du.
Beste 1583 kutsatu atzeman ziren atzo Euskadin, pandemia hasi zenetik gaur egunera arteko kopururik altuena. Horren harira, Urkulluk uste du koronabirusaren delta aldaerak "aurreikusi ezinezko" egoera eragin duela lurraldean. Izan ere, autonomia-erkidegoan, dagoeneko kasuen % 75 dira aldaera horri lotutakoak.
Hori dela eta, lehendakariak eskatu zion Pedro Sanchez Gobernuko presidenteari maskara derrigorrekoa izan dadila berriro ere une oro, eta neurriak har daitezela autonomiei "segurtasun juridikorako esparru nahikoa" emateko, hala nola gaueko mugikortasuna mugatu ahal izateko. Hala ere, Sanchezek ez du eskaera hori onartu.
