203 kasu berri atzeman dituzte EAEn, aurreko egunetako joerari eutsiz

203 covid-19 kasu berri zenbatu dituzte larunbat honetan Euskal Autonomia Erkidegoan, hau da, aurreko egunean baino 4 gehiago eta positibitate tasa % 2,8tik %3,9ra igo da. Dena dela, aurreko egunetako datuen joerari jarraitzen diote zenbakiek eta azken egunotako argazkiari eusten zaio: eguneko kutsatze berriak 2020ko abuztukoen mailan daude eta ZIUetako egoera 2020ko urrian zegoenera itzuli da.

Ospitaleko presioak ere behera egiten jarraitzen du: 11 pertsona ospitaleratu zituzten atzo covid-a dela eta (aurreko egunean baino bat gutxiago eta bi egun lehenagoko kopuruaren erdia), eta 61 pertsona daude ZIUn, azken balantzean baino bi gutxiago.

Osasun Sailak jakitera eman dituen datuen arabera, atzo 5.261 PCR eta antigeno test egin zituzten (aurreko eguneko baino ia 2.000 gutxiago) eta 44 positibo izan ziren Araban, 110 Bizkaian eta 44  Gipuzkoan. Era berean, Euskaditik kanpo bizi diren hiru pertsonak ere positibo eman zuten.

50eraino jaitsi dira covid-19 kasu berriak Nafarroan

Behera egin dute, berriro, covid-19 kasu berriek Nafarroan, atzo 50 kutsatze zenbatu ondoren, bezperan baino 9 gutxiago.

Orotara, 1.446 PCR proba eta test antigeno egin ziren atzo, eta positibitate tasa % 3,5era jaitsi zen. Nafarroako Gobernuak zabaldutako oharrean jasotzen denez, Tafallan zazpi kasu zenbatu ziren, eta Iruñeko Txantrea eta Azpilagaña auzoetan, hiruna.