Gizartea
KORONABIRUSA
Positiboek gora egin dute Nafarroan, 86raino
EITB MEDIA | AGENTZIAK
Astelehenean baino 21 gehiago zenbatu dituzte. Sarrigurenen bederatzi kasu hauteman dituzte, sei Tuteran eta bost Zizur Nagusian.
-
Nafarroako Ospitale Guneko Zainketa Intentsiboen Unitatea. Artxiboko argazkia: EFE
Positiboen gorakadarekin hasi du ekaina Nafarroak. Nafarroako Gobernuak zabaldutako datuen arabera, 86 kutsatze zenbatu dituzte azken orduetan, bezperan baino 21 gehiago.
Atzokoan 2.282 proba diagnostiko egin zituzten (astelehenean baino 268 gehiago), eta horietatik % 3,8 positibo izan ziren. Hala, proba gehiago eginda, gora egin du positibotasun tasak (% 3,2an zegoen).
Kasu gehien pilatzen dituzten udalerri eta guneei dagokienez, Sarriguren dago guztien buruan. Ondoren, Tutera eta Zizur Nagusia ageri dira, seirekin eta bostekin, hurrenez hurren.
Azken zazpi egunetako eboluzioari erreparatuta, 50 kasu hauteman zituzten iragan asteartean (% 2,3), 93 asteazkenean (% 4,4), 77 ostegunean (% 3,7), 79 ostiralean (% 3,8), 57 larunbatean (% 4,7), 50 igandean (% 4,5) eta 65 astelehenean (% 3,2).
Maria Chivite Nafarroako presidenteak berretsi duenez, Foru Erkidegoak badu bere ibilbide-orria covidaren deseskatze prozesurako: "motela, progresiboa, baina batez ere zuhurra".
"Guztiok maskara kentzeko irrikitan gaude", esan du, "une egokia iritsiko da, hau ez dena, txertatutako herritarren ehuneko altuena dugunean izango da", eta hori ahal bezain laster izatea espero duela esan du, baina "oraindik ez".
