Gizartea
Palma Arena auzia
Iñaki Urdangarin Washingtonen da, bere abokatuaren esanetan
Erredakzioa
Auzitegi Nazionalak Iñaki Urdangarinen jarduera ikertzeari uko egin zion atzo.
Albisteak (3)
Mario Pascual Vives Iñaki Urdangarinen abokatuak esan du Palmako Dukea Washingtonen dagoela, eta ez Espainian. Horrez gain, auziaren sumarioaren inguruko filtrazioak gogor kritikatu ditu.
Hedabideen aurrean egindako adierazpenen arabera, Urdangarinen inguruan "nahasmen, zurrumurru eta datu ugari" argitaratu dira azken asteetan. "Dena argitu arte itxaron behar dugu, datuak zehatzak ez direlako" gaineratu du.
Horrez gain, sekretupean egon diren informazioak argitaratzeagatik "norbaitek arazoak izango" ditzakeela azpimarratu du Urdangarinen abokatuak.
Atzo, aireportuan harrapatu zuten
Kazetariek Iñaki Urdangarin harrapatu zuten atzo Washingtoneko aireportua. Palma Arena auzian auzipetu zutenetik agertzen diren lehen irudiak dira horiek. Iñaki Urdangarin bakarrik zegoen eta argalagoa ematen zuen. Antza denez, Palmako dukea Gasteizera joango da laster, Juan Urdangarin, bere aita, bisitatzera; izan ere, azken asteotan bere osasun egoerak okerrera egin du.
Urdangarinen balizko bisitak ikusmina piztu du Arabako hiriburuan eta Palmako Dukearen etxe aurrean, Ajuria Eneatik oso gertu, hainbat kazetari daude.
Arabako hiriburuko urbanizazio pribatuan bizi da Urdangarinen familia. Gasteizko gune garestienetariko bat da, eta inguruan hainbat berdegune eta kirol-instalazio daude.
Jose Castro Palmako Instrukzioko 3. Epaitegiko epaileak joan den abenduaren 29an auzipetu zuen Iñaki Urdangarin. Epaitegi horrek ikerketarekin jarraituko du; izan ere, Ismael Moreno Auzitegi Nazionaleko epaileak Babel operazioa ikertzeari uko egin dio gaur. Babel operazioak Iñaki Urdangarin Palmako dukeak Noos Institutuan izandako jarduera ekonomikoa ikertzen du.
Epailearen autoaren arabera, auzian ikertzen ari diren iruzurrak ez dira "horren garrantzitsuak" Auzitegi Nazionalak ikertzeko.
