Osakidetza datorren astean has liteke 59 urte beherakoak txertatzen

Aurreikuspen arabera, Osakidetza datorren astean has liteke 59 urte baino gutxiago dituzten pertsonak covid-19aren aurka txertatzen, 70-79 eta 60-69 urteko herritarrak behin babestuta eta dosi nahikoa izanda.

Bien bitartean, eta asteburu guztian zehar, bi adin tarte horietako pertsonei lehen eta bigarren dosiak ematen jarraituko dute EAEko txertagune handietan. Kanpaina oso erritmo onean ari da garatzen, batez ere azken asteetan gertakin kopuru handia heldu delako. Osakidetzaren beraren aurreikuspen arabera, maiatzaren 11ra arte 102.654 dosi jarriko dituzte.

Hori horrela, 59 urte baino gutxiago dituzten herritarrei hitzordua ematen hasi zaie. Susana Martin Osakidetzako Lehen Arretako Koordinaziorako zuzendariordeak Radio Euskadin zehaztu duenez, Osakidetza astelehena eta astearte bitartean abia dezake 59-58 urtekoen immunizazioa.

Osasun agintariek ezarritako txertaketa irizpideen arabera inokulatzen ari da Euskal Osasun Zerbitzua. Lehentasunezko taldeak zehaztu ziren, besteak beste adinekoen zentroetako erabiltzaile eta langileak, baita lehentasunezko gainerako taldeak ere (hala nola, adineko beste herritarrak eta ezinbesteko lana egiten zutenak)

Azken horien artean, 59 urte beherako eta premiazko lanetan ari diren 83.000 pertsonari (hezkuntza alorrekoak, langile sozio-sanitarioak, ertzainak eta udaltzainak...) AstraZeneca txertoa jarri zitzaien, eta horietatik 53.000ri lau astez atzeratu diete bigarren dosia hartzeko epea.