Positiboak 60ko langatik behera kokatu dira berriro Nafarroan

Koronabirus kasuak 60ko langatik behera kokatu dira berriro Nafarroan. Foru Gobernuak emandako behin-behineko datuen arabera, 50 positibo zenbatu zituzten atzo.

Zehazki, 1.573 proba diagnostiko (807 PCR y 766 antgeno) egin zituzten atzo (aurreko egunean baino 1.559 gutxiago), eta horietatik % 3,2 positibo izan ziren.

Bezperako datuekin alderatuta, 36 gutxiago dira. Duela astebeteko edo duela bi asteko datuekin erkatuta ere, jaitsiera izan da: 19 eta 50 kasu gutxiago, hurrenez hurren. Egoera epidemiologikoa hobetzeak murrizketa batzuen malgutzearekin egin du bat. Hala, ostalaritzaren barrualdea ireki dute, % 30eko gehienezko edukierarekin, eta bi bizikidetza unitate elkartu ahal dira eremu pribatuan.

77 urteko gizon bat hil zen ostegunean. Koronabirusak 1096 pertsona hil ditu Nafarroan dagoeneko. Bestalde, 51 087 pertsona kutsatu dira.

Atzo, 107 paziente ospitalean zeuden Foru Erkidegoan, aurreko egunean baino lau gutxiago, Foru Gobernuak jakitera eman duenez. Bi ospitaleratu berri izan ziren, horietako bat ZIUn.

Egoera herriz herri edo auzoz auzo aztertuta, Burlatan atzeman dituzte kasu gehien (sei), eta lau atzeman dituzte Lerinen eta Iruñeko Txantrea eta Donibane auzoetan.

Iruñean eta Iruñerrian positiboen % 66 baieztatu zituzten, eta Tuteran % 8. Lizarran, aldiz, ez zuten kasu berririk antzeman. Gainerako positiboak (% 26) beste eskualde batzuetan zenbatu ziren.

Adin tarteei dagokionez, 45 eta 59 arteko pertsonetan kutsatu berrien % 40 baieztatu dituzte, eta 15-29 adin tartean % 20.

Ondoren, zerrendan 30-44 adin tartea agertzen da, kasuen % 14arekin, eta 60-75 % 12 arekin. Azkenik, 15 urtez beherakoen positiboak % 10 dira, eta 75 urtetik gorakoak % 4.

Ospitaleetako egoerari dagokionez, esan bezala, 107 pertsona daude ospitaleetan (atzo baino lau gutxiago), horietatik 21 ZIUn daude (bat gehiago) eta beste 20 etxean (bi gutxiago). Gainerako 66 pazienteak ospitaletako logeletan daude (hiru gutxiago).