Gizartea
KORONABIRUSA
AstraZenecaren txertoa 65 urtetik gorakoei ere jartzea gomendatu du MOEk
EITB MEDIA | AGENTZIAK
Birusaren aldaera guztientzat gomendatu du aipaturiko txertoa Munduko Osasun Erakundeak, baita aldaera britainiarrarentzat eta hegoafrikarrarentzat ere.
-
Koronabirusaren aurkako AstraZeneca etxearen txertoa. Artxiboko argazkia: EFE
Koronabirusaren aurka AstraZeneca botika etxeak eta Oxford Unibertsitateak landutako txertoa 65 urtetik gorakoei ere jartzea gomendatu du Munduko Osasun Erakundeak (MOE). Adinekoei txerto hori jartzea baztertu du oraingoz Espainiako Gobernuak.
Gainera, birusaren aldaera guztientzat gomendatu du AstraZenearen txertoa Munduko Osasun Erakundeak, baita aldaera britainiarrarentzat eta hegoafrikarrarentzat ere. Hegoafrikak, bere aldetik, AstraZenecaren txertoa jartzeari utzi dio eraginkorra ez delakoan.
Hala ere, MOEk aitortu du aurretiazko analisiek erakutsi dutela txerto horren eraginkortasuna "pixka bat" murrizten dela aldaera britainiarraren aurrean, eta Hegoafrikakoaren kasuan, gaixotasun arin eta moderatuaren aurkako eraginkortasuna "nabarmen" murrizten dela.
Munduko Osasun Erakundearen gomendioaren berri izan ondotik, Carolina Darias Espainiako Osasun ministroak atea zabaldu dio 55 urtetik gorakoei ere AstraZenecaren txertoa jartzeko aukerari. Kolektibo honen inguruan entsegu klinikoa egiten ari dira Ameriketako Estatu Batuetan, eta emaitzak datorren hilabeterako prest egon litezke.
