Gizartea
KORONABIRUSA
109ra igo dira aldaera britainiarraren kasuak EAEn, astelehenean baino 15 gehiago
A. S. | EITB MEDIA
Sagarduik ohartarazi du ezin dela ahaztu "Britainia Handiko aldaerak eragindako kutsatzeen kopuruak gora egiteak intzidentzia nabarmen handitu dezakeela".
Albisteak (4)
Bideoak (1)
Covid-aren aldaera britainiarrarekin kutsatutakoen kopuruak gorantz jarraitzen du EAEn eta jada 109 kasu zenbatu dituzte, astelehen honetako datuekin alderatuta, 15 kasu gehiago, Gotzone Sagardui Osasun sailburuak astearte honetan jakitera eman duenez.
Gobernu Kontseiluaren osteko prentsaurrekoan, Osasun sailburuak EAEko COVID-19aren pandemiaren datuak eguneratu ditu, eta jakinarazi du dagoeneko 109 kasu atzeman dituztela Euskal Autonomia Erkidegoan. Atzo 94 izan ziren.
Horren harira, Sagarduik ohartarazi du ezin dela ahaztu "Britainia Handiko aldaerak eragindako kutsatzeen kopuruak gora egiteak intzidentzia nabarmen handitu dezakeela". "Aldaera britainiarraren 109 kasu ezagutzen ditugu une honetan", gaineratu du.
Hain justu atzo Gustavo Cilla Donostialdeko ESIko Mikrobiologia buruak onartu zuen, hainbat kalkuluren arabera, Erresuma Batuko aldaera berriak "% 5 baino gehiago" egin duela gora EAEn. Horren harira, "hainbat kutsatu izan direla, baina espero zena dela" azaldu zuen. Bere hitzetan, gaur egun kasu berrien % 20 aztertzen ari dira, "eta % 40ra igoko da azterketa kopurua", Britainia Handikoa bezalako aldaera berriak bilatzeko.
