Gizartea
TXERTAKETA
Curevac farmazia-enpresaren txertoa probatzeko parte-hartzaile bila dabil Osakidetza
A. S. | EITB MEDIA
WhatsApp bidez zabaldu den mezuan 18 urtetik gorako boluntarioak eskatzen dira, txertoa jaso ez dutenak eta covid-19a pasa ez dutenak. VOSTeuskadik testuaren egiazkotasuna berretsi du.
-
WhatsApp bidez zabaldu den mezua. Argazkia: VostEuskadi
Azken egunotan mezu bat zabaldu da WhatsApp bidez, Osakidetza CureVac enpresa alemanaren txerto berri bat probatzeko boluntario bila dabilela jakinarazteko. VostEuskadi elkarteak Twitter sarean duen kontuan baieztatu duenez, egia da saiakuntza klinikorako boluntario bila dabiltzala.
Duela egun batzuk jakin genuen Osakidetzako Biodonostia eta Biocruces Bizkaia osasun ikerketako institutuak saiakuntza kliniko horretan parte hartzeko hautatuak izan zirela, Curevac farmazia-enpresa alemanak garatu eta sustatutako txertoaren eraginkortasuna eta segurtasuna frogatzeko.
WhatsApp bidez zabaltzen ari den mezuak Gurutzetako Ospitalean egingo den saiakuntza klinikoari egiten dio erreferentzia. Horrela, 18 urtetik gorako boluntarioak eskatzen dituzte, covid-19aren aurkako txertorik jaso ez dutenak eta gaixotasuna pasatu ez dutenak.
¿Nos estáis preguntando sobre un texto de WhatsApp solicitando voluntarios/as para probar una nueva vacuna contra la #COVID19 de la empresa alemana @CureVacRNA.
— VOSTeuskadi (@VOSTeuskadi) January 26, 2021
ES CIERTO.@biocrucesHRI Y @Biodonostia están participando en este ensayo clínico.
¿¿Info¿https://t.co/2s5ysNzJpI pic.twitter.com/MUQfPoK0bD
Saiakuntzan txertoaren bi dosi emango dituzte, lehenengoaren eta bigarrenaren artean 28 eguneko tartea utzita. Boluntarioak ausaz banatuko dituzte txertoa jasoko duten taldean eta plazeboa (inolako ondoriorik ez duen konposatu bat) jasoko duten kontrol taldean.
Parte-hartzaileei urtebeteko jarraipena egingo diete, bisita medikoen eta telefono deien bidez. Gainera, informazioa erregistratzeko modua erraztuko duen mugikorrerako aplikazio batean sartu ahalko dira. Saiakuntzan parte hartzen dutenek edozein unetan eskatu ahalko dute saiakuntzan parte hartzeari uztea, eta txertoa edo plazeboa jaso duten jakin ahalko dute.
Zabaldutako testuaren arabera, entseguak otsailaren 15ean hasiko dira eta telefonoz deituko dituzte hautatuak hitzordua, eguna eta ordua zehazteko.
Saiakuntza kliniko handia izango da, mundu osoan 30.000 lagunek baino gehiagok hartuko baitute parte bertan; horietako 2.000 inguru EAEk jarriko ditu.
