Gizartea
Koronabirusa
Ipar Euskal Herrian hasi da covid-19aren aurkako txertaketa kanpaina
A. L. | EITB Media
Lehen fase honetan zahar-etxeetako egoiliarrak eta arrisku handiko pertsonak txertatu nahi dituzte.
-
Pzifer eta BioNTech konpainiek covid-19aren aurka garatutako txertoa. Artxiboko argazkia: EFE
Baionako Ospitaleak covid-19aren aurkako 5.000 dosi jaso ditu asteazken honetan, urtarrilak 6, eta arratsaldean egin dute txertaketa kanpainaren hasierako aurkezpen ekitaldia.
Lehen fase honetan, zahar-etxeetako egoiliarrak eta arrisku handiko pertsonak txertatu nahi dituzte.
Bigarren fasea, hilabete honen amaieran hasiko litzateke, eta 65 urte baino gehiagoko herritarrek eta osasun langileek jasoko lukete txertoa. Ipar Euskal Herriari dagozkion txertoak Baionako Ospitaleko hozkailuan egongo dira gordeta.
Testuinguru horretan, bi aste barru 55 zahar-etxeetako egoiliarrak, 50 urte baino gehiagoko herritarrak, arrisku handiko pertsonak eta osasun langileak txertatuta izatea espero dute tokiko agintariek.
Hain zuzen ere, Pzifer eta BioNTech konpainiek garatutako txertoak jarriko dizkiete aurreneko fase hauetan. Dena dela, herritarren artean kezka handia dago oraindik, jende askok ez omen baitu txertoa jarri nahi.
