Gizartea
KORONABIRUSA
15 egunetik behin baheketak egingo dizkiete Nafarroako egoitzetako osasun-langileei
AGENTZIAK | ERREDAKZIOA
Gaur bertan hasiko dira lau egoitza publikoekin eta datorren astean gainerako zentroetara zabalduko da. PCR probak egoitzetan lan egiten duten 5.100 pertsonari egingo zaizkie.
-
Langile bat adinekoentzako egoitza batean ohea egiten. Argazkia: EiTBko artxiboko irudia
Nafarroako Gobernuko Osasun Departamentuak, Giza-Eskubideen Departamentuarekin batera, hamabost egunean behin baheketak egingo dizkie Erkidegoko egoitza guztietan lan egiten duten 5.100 osasun-langileei. Astelehen honetan hasiko dira lau egoitza publikotan probak egiten, eta datorren astean gainerako zentroetara hedatuko da neurria.
1,34 milioi euroko inbertsioa izango du neurriak, eta osasun langileei eta langile soziosanitarioei 15 egunetik behin, bi hilabetez, PCRak egingo zaizkie. Ondoren, probak aztertu egingo dira, Santos Indurain Osasun sailburuak eta Mari Carmen Maeztu Eskubide Sozialen sailburuak prentsaurrekoan azaldu dutenez.
Adinekoen, desgaituen eta buruko arazoak dituzten pertsonak dauden egoitzetako langileei egingo zaizkie probak. Guztira, 112 zentro dira.
Baheketak lan-arriskuen prebentzio-zerbitzuek eta egoitza-zentroetako eta erlijio-kongregazioetako profesionalek egingo dituzte.
