Urtarrilaren lehen hamabostaldian hasi nahi du covid-19aren txertaketa Nafarroak

Nafarroak urtarrilaren lehen hamabostaldian hasiko du covid-19aren aurkako txertaketa, aurreikusitakoaren arabera. Asmoa da lehendabizi arrisku handiko taldeei jartzea txertoa, eta ekainetik aurrera herritar guztiengana zabaltzea txertaketa.

Horixe da, hain zuzen, Santos Indurain Osasun kontseilariak asteazken honetan emandako prentsaurrekoan aurreratu duena.

Zentzu horretan, adierazi du arrisku handiko taldeak zein diren zehaztu dutela, Espainiako Osasun Ministerioaren laguntzarekin; besteak beste, zahar-egoitzetan dauden adinekoak, langile soziosanitarioak eta behargin sanitarioak. Hortik aurrera, "modu mailakatuan" jarraituko dute gainerako herritarrei txertoa jartzen.

Indurainek azpimarratu du txertaketa ez dela derrigorrezkoa, eta lehen arretako osasun zentroek kudeatuko dutela. Halere, "erresidentzietara eta mendekotasuna duten pertsonen etxeetara ere joango dira erizainak txertoa jartzera".

Hasiera baterako, behintzat, Pfizer txertoa aukeratu dute. Indurainen esanetan, Osasun Ministerioa eta autonomia erkidegoak lan "handia" egiten dabiltza txertaketa bideratzeko.

"Nafarroak eskarmentua dauka horretan", esan du Indurainek, covid-19aren aurkako txertoaren sare logistikoa gripearenaren oso antzekoa izango dela iritzita. Horrekin lotuta aipatu du aurten iaz baino askoz jende gehiagok jarri duela gripearen kontrako txertoa (% 47 hazi da txertaketa).

Amaitzeko, argi utzi du txertoak "seguruak eta eraginkorrak" direla. Horregatik, covid-19aren kasuan ere emaitza garrantzitsuak ematea espero du Indurainek.

Oraingoz, txertaketa kanpainarekin egin dituzten aurreikuspenak kontuan hartuta, Osasun kontseilariak ez du uste langile gehiago kontratatu beharko dituztenik. Haatik, "egin beharreko esfortzu guztiak egingo" dituztela adierazi du.