Gizartea
GABONAK
Gabonetan 6ko taldeak eta 01:00erako etxeratzea proposatu du Espainiako Gobernuak
AGENTZIAK | ERREDAKZIOA
Gabonetan familia eta gizarte bilerak 6 laguni mugatzea eta Gabon gauean eta Urtezahar gauean etxeratze-agindua 01:00ean jartzea proposatu du.
Espainiako Gobernuak Gabonetan egiten diren familia eta gizarte bilerak 6 laguni mugatzea proposatu du, eta abenduaren 24an eta 31n, Gabon gauean eta Urtezahar gauean, 01:00etatik 06:00etara, gaueko konfinamendua egitea.
Hala aurreikusten du Exekutiboak Gabonetako jaietarako prestatu duen COVID-19aren aurkako osasun publikoko neurrien proposamenaren zirriborroak, eta bihar Osasun Sistema Nazionaleko Lurralde arteko Kontseilura (CISNS) eramango du proposamen hori erkidegoekin lantzeko.
Zehazki, dokumentuan adierazten denez, familia-eremuko bileretan, bizikidetza-talde bereko kideak ez direnen parte-hartzea mugatzea gomendatzen da; hala ere, ohiko bizikidea ez den kanpoko kideren bat egonez gero, bilerak gehienez 6 pertsonakoak izango dira, eta prebentzio-neurriak bermatu beharko dira, familiakoak diren ala ez kontuan hartu gabe.
Gainera, gizarte-arloko bilerak saihestea edo gutxitzea gomendatzen da (lan-ospakizunak, ikasle ohien afariak...), eta, bilerak eginez gero, gehienez 6 lagunekoak izan beharko dute, eta, ahal dela, kanpoan (aire librean edo terrazetan) egitea eskatzen da.
Bestalde, oporretan etxera itzultzen diren unibertsitateko ikasleei "etxera itzuli aurreko egunetan interakzio sozialak mugatzeko eta prebentzio neurriak zorrozteko" eskatu zaie.
Ez lukete familia edo gizarte bileretara joan behar COVID-19a diagnostikatu zaien eta oraindik kutsatzeko moduan dauden pertsonek; COVID-19aren sintomak dituztenek; koronabirusaren proba diagnostikoaren emaitzen zain daudenek; edo azken 14 egunetan COVID-19a duen norbaiten eraginpean egon direnek.
Mugikortasunari dagokionez, Gobernuak behar-beharrezkoak ez diren bidaiak saihestea gomendatzen du, eta une horretan lurralde horretan aplikatzen den araudia aldez aurretik berrikustea. Nazioarteko bidaien kasuan, arrisku-herrialde edo eremu batetik datozen eta Espainian sartu nahi duten herritarrek PCR negatiboa izan beharko dute, joan-etorria egin baino 72 ordu lehenago egina.
Ekitaldiak eta ospakizun handiak
Errege-kabalgata eta garai horietako ohikoak izaten diren bestelako ekitaldiak, "transmisio-arrisku handikoak" dira, eta, beraz, ez egitea gomendatzen da. Egingo balira, higiene eta prebentzio-arauak betetzen direla bermatuz egin beharko dira.
Gabonetako kontzertuei edo Jaiotzak ikustera egiten diren bisitei dagokienez, edukiera % 50ekoa izango da, eta sarrera eta distantzia kontrolatzeko moduko instalazioetan egingo dira.
Gainera, kultur ekitaldietarako, ostalaritzarako eta merkataritzarekin loturiko ekitaldietarako aire libreko gune publikoa gehiago erabiltzea gomendatzen da. Kirol ekitaldi handiak egin ahal izango dira, hala nola San Silvestre Maratoia, betiere gaueko mugikortasunaren ordutegia oztopatzen ez badu eta korrikalarien arteko kontaktua murrizteko estrategiak erabiltzen badira. Ikuslerik gabe egitea gomendatzen da.
Espainiako Gobernuak gogorarazi du testuinguru guztietan prebentzio-neurriak mantendu behar direla: maskara (maskara ahalik eta denbora gehien erabiltzea); eskuak (eskuak sarri garbitzea); distantzia (elkarren arteko distantzia mantentzea); aireztapena eta aire zabaleko jarduerak egitea (leihoak eta ateak irekita mantentzea, tenperaturaren arabera segurua eta egingarria den neurrian) eta kontaktu kopurua gutxitzea (ahal dela, beti berdinak).
