Gizartea
KORONABIRUSA
URAk ur zikinak aztertuko ditu berriro koronabirusaren arrastoen bila
AGENTZIAK | ERREDAKZIOA
EAEko hiri eta herrietako ur zikinetan SARS-CoV-2 material genetikoaren arrastoak aurkitzeko egiaztatutako eta homologatutako bitartekoak izatea da helburua, birusaren zirkulazioa garaiz atzemateko.
-
Bilboko Ur Partzuergoko langilea. EiTBren bideo batetik ateratako irudia
Beste behin, Uraren Euskal Agentziak (URA) koronabirusa aztertzeko zerbitzuak eskaini ditu eta EAEko hiri eta herrietako ur zikinak ikertuko ditu, alerta-sistema goiztiarra eskaintze aldera.
Zehazki, hiri eta herrietako ur grisetan SARS-CoV-2 material genetikoaren arrastoak topatu ahal izateko egiaztatutako eta homologatutako bitartekoak izatea da helburua, birusak herritarrengan duen zirkulazioa garaiz atzemateko.
URAk gogorarazi duenez, metodo horrek sentsibilitatea erakutsi zuen aurretik egindako azterketetan, baita COVID-19aren kutsakortasun maila baxua zenean ere.
Trantsizio Ekologikorako eta Erronka Demografikorako Ministerioak eskatuta egin da azken urte honetan ur zikinen jarraipena, ur girsetan eta bainua hartzeko aukera dagoen uretan zaintza mikrobiologikoa egiteko. URAk, gainera, Espainiako Gobernuaren proiektuaren baitan sartzen ez ziren eremuen zaintza egin zuen.
Orain egingo dituzten lanetan 123 lagin hartuko dira Donostiako, Hondarribiko eta Bilboko araztegietan.
