Gizartea
Koronabirusa
Kontsultatu hemen Jaurlaritzak iragarritako neurri murriztaile berriak
eitb.eus
Jaurlaritzak ostalaritza ixtea eta etxeratze-agindua 22:00etarako aurreratzea agindu du. Neurriak abenduaren 10era arte egongo dira indarrean.
Koronabirusaren hedatzeari aurre egiteko Eusko Jaurlaritzak hartutako eta indarrean dauden neurri murriztaileak:
- Gaueko 22:00etatik goizeko 06:00etara pertsonen zirkulazio-askatasuna mugatzea.
- Jarduera sozioekonomikoak 21:00etatik aurrera mugatzea. Merkataritza-establezimendu guztiei eragingo die; farmaziei eta gasolindegiei izan ezik.
- Dendek eta supermerkatuek itxiera ordura (21:00ak) arte saldu ahalko dute alkohola. Orain arte 20:00ak arte bakarrik sal zitzaketen alkoholdun edariak.
- Edukiera mugak saltokietan. 50 metro koadro gorako dendek eta lokalek % 60ra mugatu beharko dute edukiera. Saltoki handienetan solairu eta denda guztietan bermatu beharko dute edukiera hori. Gainerako saltokiek % 75eko edukiera izango dute.
Horrez gain, dendariek 65 urtetik gorako bezeroei lehentasuna eman beharko dietela agindu dute. Halaber, bezeroen zirkulazioa bideratzeko ibilbideak egin beharko dituzte saltokietan, pilaketak eta kontaktuak saihesteko.
- Ostalaritzako eta jatetxeetako establezimenduak itxiko dira. Kanpoan geratzen dira hoteletako eta beste ostatu batzuetako jantokiak, egoiliarrei zerbitzua emateko. Jatorduak etxez etxe prestatu eta zerbitzatu ahal izango dira, aldez aurretik hitzordua eskatuta, 21:00ak arte. Gasolindegietan, osasun-zentroetan, zentro soziosanitarioetan, eskola-jantokietan, lantegi eta jantoki sozialetako zerbitzu-guneetan sartzen diren jatetxe-zerbitzuak kanpoan geratzen dira. Kafetegi-zerbitzua modu osagarrian eskaintzen duten okindegi-gozotegi moduko establezimenduek ezin izango dute zerbitzu hori eskaini, eramateko izan ezik.
- Kultur jarduera, ikuskizun edo ekitaldi guztiak gaueko 21:00ak baino lehen bukatu beharko dira. Musika- eta ahots-entsegu kolektiboak edo dantza-entsegu kolektiboak, profesionalak ez direnean, bertan behera gelditzen dira. Debekatuta dago gozokiak, freskagarriak edo antzekoak saltzea eta kontsumitzea horrelako jarduerekin lotutako instalazioetan.
- Taldeko edozein kirol-jarduera garazita dago, lehiaketa profesionala edo erdi-profesionala izan ezik. Bestalde, gimnasio, kirol-talde, igerileku eta kiroldegietan programatutako ikastaroak edo jarduerak egin ahal izango dira, eskola-kirola izan ezik, baldin eta maskara erabiliz egiten badira, sei laguneko taldeetan gehienez, eta edukiera % 40ra mugatuta badago.
- Debekatuta dago kirol-ekitaldietara joatea.
- Bakarka edo bizikideekin bakarrik egin ahal izango da kirola. Betiere, igerilekuetan izan ezik, banakako jarduera fisikoa edo kirola maskaraz egin beharko da hiri-inguruneetan.
- Joko eta apustu establezimenduak eta lokalak itxita egongo dira.
- Gaueko 22:30ak izango dira garraio publikoa lurralde historikotik ateratzeko gehienezko ordutegia. Salbuetsita dago taxia edo gidaria duen ibilgailuaren alokairua.
- Kultu jardueretan aforoa %35ekoa izango da gehienez. Halaber, erabiltzaileen arteko 1,5 metroko distantzia bete beharko da. Gehienezko edukiera kultu-aretoan jarri beharko da, ikusteko moduko lekuan.
- Lantokietan nahitaezkoa izango da maskara erabiltzea. Betebehar hori ez da eskatuko lan-baldintzak bereziak kontuan hartuta, laneko osasun-zerbitzuek ez erabiltzea gomendatzen duten kasuetan. Nolanahi ere, 1,5 metroko segurtasun-distantzia gorde beharko da.
AURREKO NEURRIEK ERE INDARREAN JARRAITZEN DUTE
1- Gauez zirkulatzeko askatasuna mugatuta egongo da 22:00etatik 06:00etara (ordubete aurreratu dute gaur neurri hau). Hala ere, beharrezkoak diren jarduerak egiteko posible izango da kaletik ibiltzea.
Hauek aipatzen ditu zehazki dekretuak: sendagaiak, osasun-produktuak eta premia biziko beste ondasun batzuk erostea; osasun-zentroetara joatea; albaitaritza-zentroetara joatea urgentziazko arrazoiengatik; laneko, lanbideko, enpresako, erakundeetako edo legezko betebeharrak betetzea; ohiko bizilekura itzultzea, atal honetan aurreikusitako jarduera batzuk egin ondoren; adinekoei, adingabeei, menpekotasun-egoeran daudenei, desgaitasunen bat dutenei edo bereziki ahulei laguntza eta zaintza ematea; gasolindegietan edo gasolina-zerbitzuguneetan erregaia hartzea, aurreko paragrafoetan aurreikusitako jarduerak egiteko beharrezkoa denean, eta ezinbestekoa den edozein jarduera, betiere behar bezala egiaztatuta badago.
2- Euskal Autonomia Erkidegoko mugak itxita egongo dira. Salbuespenak izango dira eta beharrezkoak diren kasuetan posible izango da EAEko mugak zeharkatzea, besteak beste, osasun arreta jasotzeko, lanera joateko, ikasketengatik edo zaintza arrazoiengatik.
3- Udalerri guztietan sarrera-irteerak itxita egongo dira. Alabaina, udalerri mugakideen arteko mugikortasuna baimenduko da jarduera sozioekonomikoak egiteko (udalerri mugakidean egin ohi diren jarduerak, eta 2. artikuluan jaso diren salbuespenen artean ez daudenak, esaterako: supermerkatura joatea, tindategira, jatetxera edo haurtzaindegira joatea, eta gure udalerrian bertan egin ditzakegun baina, hurbiltasunagatik eta irisgarritasunagatik, udalerri mugakidean egitea komeni zaizkigun jarduera sozial eta/edo ekonomikoak, Jaurlaritzak gerora kaleratutako gidan jasotzen denez).
Udalerri mugakideetara joan ahalko gara, halaber, kirol-jarduerak edo aire zabaleko jarduera fisikoak egiteko, edota baimendutako kirol-lehiaketetarako beharrezkoak diren lekualdatzeak egiteko.
Aurreko bi kasuetan bezala, posible izango da udalerritik ateratzea, besteak beste, osasun arreta jasotzeko, lanera joateko, ikasketengatik edo zaintza arrazoiengatik.
4- Gehienez sei pertsona bildu ahalko dira taldean, eremu publikoan nahiz pribatuan. Bizikideak izatea izango da salbuespena eta kasu horretan ez da mugarik egongo.
Neurriak
- Zirkulatzeko askatasuna 22:00etatik 06:00etara, mugatuta
- EAEn pertsonen sarrera eta irteera, mugatuta (salbuespenak izan ezik)
- Herritarrek bizilekutzat duten herritik ateratzeko aukera, mugatuta (salbuespena izan ezik)
- MASKARA NAHITAEZ ERABILI BEHAR DA KALEAN ETA LANTOKIAN - Informazio gehiago
- Ostalaritza eta jatetxeak – ITXITA.
- Jarduera sozioekonomikoak – 21:00ak baino lehen, ITXITA.
- Txoko, etxabe eta antzekoetan – Jarduera oro debekatuta.
- Gorputz eta kirol jarduera – Talde jarduerak, debekatuta.
- Kale-edana – DEBEKATUTA.
- Kirol ekitaldietara joatea, debekatuta.
- Espazio publikoetan erretzea –2 metroko gutxieneko tartea.
- Alkoholaren salmenta – 20:00etatik 08:00etara, DEBEKATUTA.
- Kirol establezimenduak – Jarduera oro debekatuta.
- Garraio publikoa – Amaitzeko ordua: 22:30 (taxi eta gidaririk gabeko ibilgailuak izan ezik.
- Kalean eta eremu pribatuan – Gehienez ere, 6 pertsona.
- Beilatoki eta ehorzketetan – 30 pertsona aire zabalean eta 6 pertsona toki itxietan.
- Merkatu eta azoka txikiak aire zabalean – Postuen % 50.
- Bisitak egoitzetan – Pertsona bat egunean, ordubetez.
- Erlijio ekitaldiak – Gehieneko edukieraren % 35.
- Kultur ekitaldiak –21:00ak baino lehen bukatu behar.
- Musika- eta ahots-entsegu eta emanaldi kolektiboak edo dantzakoak, parte-hartzaileak profesionalak ez badira, bertan behera.
