Medikuntzako Nobel saria, C hepatitis gaitzaren birusaren aurkitzaileentzat

Harvey J. Alter, Michael Houghton eta Charles M. Rice ikertzaileek irabazi dute 2020ko Medikuntzako Nobel saria, C hepatitis gaitza eragiten duen birusaren aurkikuntzagatik, Stockholmeko Karolinska Institutuak astelehen honetan jakinarazi duenez.

Hiru zientzialari horiek ekarpen erabakigarria egin dute odol-transmisioko hepatitisaren aurkako borrokan, izan ere, C hepatitisaren birusa identifikatzea lortu dute. Aipaturiko gaitzak zirrosia eta gibeleko minbizia eragiten ditu.

Harvey J. Alterrek egindako transfusioei lotutako hepatitisaren azterketa metodikoek frogatu zuten birus ezezagun bat hepatitis kronikoaren kausa arrunt bat zela; Michael Houghtonek, berriz, frogatu gabeko estrategia bat erabili zuen C hepatitisaren birusa deitu zitzaion birus berriaren genoma isolatzeko; eta Charles M. Ricek, berriz, C hepatitisaren birusak berak bakarrik gaitza eragin zezakeela erakusten duen azken ebidentzia eman zuen.

Hiru ikerlari horien lanaren aurretik, A eta B hepatitisaren birusak aurkitzea aurrerapauso handia izan zen, baina odolak transmititutako hepatitis kasu gehienek azalpenik gabe jarraitzen zuten. C hepatitisaren birusaren aurkikuntzak hepatitis kronikoaren gainerako kasuen zergatia azaldu zuen, eta milioika bizitza salbatu dituzten odol-analisiak eta sendagai berriak ahalbidetu zituen.

Medikuntzako sariaren irabazlearen ostean, Fisikako, Kimikako, Literaturako, Bakearen eta Ekonomiako Nobel saridunen berri emango dute datozen egunotan.

BREAKING NEWS:
The 2020 #NobelPrize in Physiology or Medicine has been awarded jointly to Harvey J. Alter, Michael Houghton and Charles M. Rice “for the discovery of Hepatitis C virus.” pic.twitter.com/MDHPmbiFmS

— The Nobel Prize (@NobelPrize) October 5, 2020