Gizartea
Elkarrizketa Radio Euskadin
Gorka Orive: "Jantokiak puzzle honetan ondo egokitzen ez diren piezak dira"
Radio Euskadi | Erredakzioa
Koronabirusa zabaltzea saihesteko, espazio itxiak aireztatzeak duen garrantzia nabarmendu du Gorka Orive ikertzaileak ostegun honetan Radio Euskadin egindako elkarrizketan.
-
Gela bat, hutsik. Argazkia. EFE
Gorka Orive EHUko Farmazia irakasle eta ikertzaileak ostegun honetan nabarmendu duenez, COVID-19aren inguruko gauza gehiago dakizkigu pandemiaren bilakaerarekin. Testuinguru horretan, gainazaleko transmisioak "indarra galtzen doa"; aldiz, tantak eta aerosolak "airean irauten duten partikulak dira, flotatzeko eta mugitzeko gai dira, aire girotuaren bitartez, adibidez".
Hainbat ikerketak egiaztatu dute partikula horiek gaitza zabaltzeko gai direla, eta ez soilik hurbilen daukagun pertsonarekiko, baizik eta urrutiago daukagun norbanakoa ere kutsatu daiteke, oro har gaizki aireztatutako espazio itxietan, jende ugari biltzen den tokietan eta maskarak erabiltzen ez diren lekuetan".
Testuinguru horretan, asko dira kontuan hartu beharreko esparruak, hala nola jatetxeak, tabernak, bulegoak edo garraio publikoa, baina Oriveren iritziz, "puzzle honetan ondo egokitzen ez diren piezak dira jantokiak". Bere ustez, "ehunka haur daude aldi berean espazio itxi batean, elkarrengandik nahiko hurbil, bata bestearen ondoan jaten, eta, beraz, maskara kenduta. Ez dira tokian geldirik egongo, nolabaiteko mugimendua egongo da".
Gaitzak uzten dituen ondorioak
Ikertzaileak nabarmendu duenez, "koronabirusa pairatu duten milaka gaixok horren ondorioak dituzte oraindik, baita COVID-19a izan eta 3 hilabetera ere. Ondorio horiek era askotarikoak dira, ez dago patroi orokorrik. Nekea edo disnea dira nagusi, baita arnasa hartzeko zailtasuna ere. Gaitza duten pazienteengan, baina baita sintomatirik ez dutenengan ere. Arnasteko ahalmen txikiagoa hor dago, eta, zalantzarik gabe, askoz ere iraunkorragoa da zenbat eta larriago egon".
Jatorrizko informazioa Radio Euskadik landu eta eitb.eus-ek itzuli du:
