Gizartea
KORONABIRUSA
AstraZenecak eten egin du Oxfordeko COVID-19aren aurkako txertoaren entsegua
AGENTZIAK | ERREDAKZIOA
Entsegua gelditzea erabaki dute, parte-hartzaileetako bati "jatorri zehazgabeko gaitza" atzeman ondoren.
Albisteak (3)
AstraZenecak iragarri duenez, COVID-19aren aurka garatzen ari den txertoaren entsegua bertan behera uztea erabaki du, parte-hartzaileetako bati "jatorri zehazgabeko gaitza" atzeman ondoren. Konpainiaren esanetan, "ohikoa" da erabaki hori.
Gaixotu den boluntarioa Erresuma Batuan bizi da, Staten arabera. Ez dakite zer-nolako kontrako erreakzioa izan duen boluntarioak, baina sendatzea espero dute.
"Oxfordeko koronabirusaren aurkako txertoarekin egiten ari diren saiakuntza global kontrolatu eta aleatorizatuen barruan, gure berrikuspen estandarraren prozesuak txertaketa eten du, segurtasun-datuak berrikusi ahal izateko", adierazi du konpainiak ohar baten bidez.
"Ohiko urratsa da, eta saiakuntzetako batean jatorri zehazgabeko gaitza ageri denean egin behar da, horien osotasunari eusten diogula ziurtatuz", gaineratu du AstraZenecak, AEBko hedabideek jaso dutenez.
Konpainia horren arabera, saiakuntza handietan "gaixotasunak kasualitatez agertuko dira", baina baldintza horiek "banan-banan berrikusi behar dira, (datuak) arretaz egiaztatzeko".
Testuinguru horretan, AstraZenecak "gertaera bakar" horren "berrikuspena bizkortzeko" lanean ari direla ziurtatu du, "saiakuntzaren denbora-lerroan izan dezakeen edozein eragin minimizatzeko".
Era berean, adierazi du "konprometituta" dagoela azterketan parte hartu dutenen "segurtasunarekin", eta, aldi berean, bere saiakeren "jokabide estandar altuenak" nabarmendu ditu.
AstraZenecak 2021eko lehen seihilekorako zuen aurreikusita txertoa, eta Munduko Osasun Erakundeak (MOE) munduko aurreratuenetakotzat jotzen zuen.
