Gizartea
Osasun larrialdia
Tabernetako edukierak, ordutegiak eta pertsonen bilerak murriztuko dituzte berriro
AGENTZIAK | ERREDAKZIOA
Osasun larrialdia ezarri ostean, neurri murriztaileak iragarri ditu Jaurlaritzak, eta asteartean zehaztuko ditu LABI Batzordean.
-
Gasteizko taberna baten irudietako bat. Argazkia: EFE
Koronabirusaren hedapena gelditzeko Eusko Jaurlaritzak ezarriko dituen neurri berriak adostuko dituzte datorren asteartean LABI Batzordean, Arantxa Tapia Eusko Jaurlaritzako Garapen Ekonomikorako sailburuak iragarri duenez. Besteak beste, tabernetako edukierak, ordutegiak, pertsonen bilerak eta garraio publikoen gaueko ordutegiak murriztuko dituzte neurri horiek.
Prentsaurrekoan Tapiak azaldu duenez, "ezohiko agertokira" itzuliko gara astelehenetik aurrera, egun horretan bertan osasun larrialdia indarrean sartuko baita. Hortik aurrera, Estefania Beltran de Heredia Segurtasun sailburuak LABI-Euskadiko Babes Zibilerako Plana aktibatuko du, eta lehendakariak berak zuzendu eta koordinatuko du batzorde hori. Lehenengo bilera datorren asteartean, abuztuak 18, izango da, lehendakaria buru, eta erakunde anitzeko ordezkariekin.
"Osasun arrazoiak"
Tapiak azaldu duenez, "osasun arrazoiengatik" ezarri da EAEn osasun larrialdia, eta horri esker, une bakoitzari egokitutako neurri zehatzak ezarri ahalko dira. Oro har, Euskadi osorako neurriak egongo dira eta bestalde, neurri "zehatzak, ezohikoak", koronabirusak bereziki astindutako udalerrietan, alorretan nahiz eremuetan ezarriko direnak.
Tapiak aurreratu duenez, koronabirusaren hedapena gelditzeko ezarriko dituzten neurri berriak datorren asteartean adostuko dituzte, LABI Batzordean, alegia. Neurri horiek, besteak beste, tabernetako edukierak, ordutegiak, pertsonen bilerak eta garraio publikoen gaueko ordutegiak murriztuko dituzte. Gainera, bereziki kaltetutako udalerritan neurri murriztaile bereziak ezarriko dituztela iragarri du.
Aginte bakarra
Tapiak argitu duenez, LABI Batzordeko aginte bakarra lehendakaria izango da, eta bertan adostutako neurriak euskal gizarteari jakinaraziko dizkiote, baita gehien kaltetutako taldeei zuzenean. "Agertokia aldakorra" da, Tapiaren hitzetan, eta kutsatuen kopurua kontrolatuz gero, neurriak bertan behera uzten joango dira. "Atzerapauso hori ez da atsegina, baina ezinbestekoa da, beharrezkoa eta premiazkoa", gaineratu du. "Ez da alarma egoera bat, ez da martxoko edo apirileko konfinamendua bezalakoa, edo martxoan ezarritako neurri murriztaileak bezalakoak", azpimarratu du.
