Diskotekak 5:00ak arte irekiko dituzte, neurri berria BOEn argitaratu arte

Tabernek goizaldeko hirurak arte eta diskotekek bostak arte ireki ahal izango dute Euskadin, Estatuko Aldizkari Ofizialean (BOE) Salvador Illa Espainiako Osasun ministroak eta autonomia erkidegoek ostiral honetan hartutako erabakia argitaratzen ez den bitartean. Gaur plazaratutako neurri berriak gaueko aisialdiko establezimenduak ixteko eskatzen du.

EAEko Auzitegi Nagusiak, ebazpenean, gaueko aisialdirako establezimenduak ixteko ordutegia luzatu du; hala, pubek goizaldeko hirurak arte irekitzeko aukera izango dute, diskotekak, ostera, goizaldeko bostak arte. Ordutegia zabalduta ere, dantza pistek itxita jarraitu beharko dute.

Auzitegi Nagusiaren autoa Espainiako Gobernuak autonomia erkidegoekin batera hartutako erabakiarekin batera iragarri da. Gobernu Zentralaren neurria Estatu osoan nahitaez bete beharrekoa izango da behin BOEn argitaratzearekin batera.

Ostalariek murrizketaren aurkako helegitea aurkeztuko dute

Bizkaiko eta Gipuzkoako ostalaritza elkarteek helegitea aurkeztuko dute berriro Eusko Jaurlaritzaren erabaki murriztaile berriaren aurka.

Bi erabaki horiek sortutako egoera kontraesankorraren aurrean, neurri berria Euskal Herriko Agintaritzaren Aldizkarian argitaratu arte, gaueko aisialdiaren ordutegia mugatzeko gaur hartutako erabaki berria bertan behera geratzen da, eta "gaur egun indarrean dagoena, EAEko Auzitegi Nagusiaren ebazpena" azpimarratu dute.

Aurreratu dutenez, Salvador Illa Osasun ministroak ostiral honetan iragarri dituen neurriak hartzen direnean, EAEko ostalariek berriro joko dute Euskal Autonomia Erkidegoko Auzitegi Nagusira. Hura izango da auzia ebazteko organo judizial eskuduna, neurria administrazio-agindu autonomikoa baita.