Gizartea
BIZKAIA
Ama Birjinaren eguna ospatuko dute bihar Bilbon, erromeriarik eta aurreskurik gabe
AGENTZIAK | ERREDAKZIOA
Bi ekitaldiak bertan behera geratu dira, pilaketak eragin ditzaketen ekintzak saihesteko helburuarekin.
-
Begoñako basilika. Irudia: EiTB
Bilbok Begoñako Ama Birjinaren eguna ospatuko du bihar, erromeriarik gabe eta Juan Maria Aburto Bilboko alkateak bilbotarren omenez egin ohi duen aurreskurik gabe, Bizkaiko hiriburuan eta beste euskal herri batzuetan koronabirusaren kutsatzeen gorakadak sortutako egoera sozial eta sanitarioa dela eta.
Bilboko Udalak gogorarazi duenez, Begoñako basilikaren kanpoaldean egin ohi diren bi ekitaldiak bertan behera uzteko arrazoia jendetza pilatzea eragin dezaketen ekintzak ekidin behar direla izan da, COVID-19aren osasun-gomendioak errespetatuz.
Horrela, Begoñako basilikaren barruan indarrean dauden edukiera-murrizketak eta higiene-neurriak mantenduko dira, eta katolikoentzat egun horretan tenpluan eskaintzen diren zortzi eukaristietako batera joateko plaza erreserbatu beharko da, aldez aurretik hitzordua eskatuta.
Bi ekitaldiak bertan behera geratu diren arren, Bilboko alkateak, aurreko urteetan bezala, 12:00etan Basilika horretan egingo den mezan izango dela iragarri du.
Bilboko Udalak hartu du aurreskua eta erromeria herrikoia bertan behera uzteko erabakia, Apezpikutzarekin koordinatuta.
1995ean Jose Maria Gorordo garai hartako Bilboko alkateak aurreskua dantzatzeko ohitura berreskuratu zuenetik Udalak herritarren omenezko ekitaldia bertan behera uztea erabakitzen duen lehen aldia da.
