Ez, Eusko Jaurlaritzak ez ditu neurri murriztaile gehiago ezarri oraingoz

Euskal Autonomia Erkidegoan (EAE) koronabirusak eragindako pandemiaren bilakaerari aurre egiteko asmoz, Eusko Jaurlaritzak ustez hartutako neurri murriztaile berriak aurreratzen dituzten bi mezu bolo-bolo zabaltzen ari dira azken orduetan WhatsApp bidez.

Bi mezuak oso antzekoak dira edukiari dagokionez, baina horietako bat bestea baino zertxobait kezkagarriagoa dirudi, adierazten baita agintariek "Kantabriarekin hitz egingo dutela erkidegoa ixteko eta bigarren egoitzak husteko". Gainera, "kutsatzeak moteltzen badira, abuztuaren 24an beste bilera bat egiteko deialdia" dagoela ziurtatzen du batek, besteak horren inguruko aipamenik egiten ez duen bitartean. Halaber, irailaren 1erako "neurri murriztaile gehiago" iragarriko dituztela ziurtatzen du. Gainerakoan, bi mezuak ia berdinak dira.

Guztiz faltsua den testu horren arabera, "lehen bilera itxita dago" jada, eta, topaketa horretan, garraio publikoan eta ostalaritzan eragina izango luketen hainbat neurri adostu dituzte. Gainera, "arau horiek datorren astelehenean, abuztuaren 17an, jakinaraziko dituzte".

Gauzak horrela, "garraio publiko orok 22:00etan amaituko du zerbitzua, Gautxoria barne; beraz, ez da eskuragarri egongo", adierazi du ohar horrek. Eguneko garraio publikoari dagokionez, "edukieraren% 50era" mugatuko litzateke, eta maiztasuna "20 minuturo izango litzateke, ez 10 minuturo, orain arte bezala".

Gainera, ostalaritzan "debekatuta dago jendea zutik egotea lokalaren barruan zein kanpoan; terrazetan jendea eserita egotea baimentzen da bakarrik". Jatetxeei dagokienez, "edukieraren % 40an ireki ahal izango dute, aldez aurretik hitzordua jarrita eta 23:00etarako itxi (24:00etan hustuta)".

Era berean, tabernak 24:00etan itxi beharko lituzkete, eta ordu horretatik aurrera lokala "jasotzeko, garbitzeko eta desinfektatzeko" bakarrik joan ahalko litzateke establezimendura. "Arau" horrek txokoetan, lokaletan eta elkarte gastronomikoetan ere izango luke eragina, bertan "10 pertsona baino gehiago biltzea debekatuta" legokeelako.

Dena dela, bi mezu horiek guztiz faltsuak dira, Eusko Jaurlaritza Euskadiko egoera epidemiologikoa aztertzen ari baita oraindik, eta oraingoz ez du COVID-19arekin lotutako kasuen gorakadaren ondorioz neurririk hartuko duen edo ez ofizialki esan.

Euskadiko egoera epidemiologikoaren larritasunak gaur egungo erritmoan gora egiten jarraitzen badu, "osasun-larrialdiko egoera ezartzeko unea izango litzateke", esan zuen Nekane Murga Osasun sailburuak ostegun honetako prentsaurrekoan.

Euskal Irrati Telebistak, #Koronabuloak ekimenean, Maldita.es-ekin, VOSTEuskadi Euskadiko Boluntario Digitalen Elkartea ere du bidelagun, koronabirusaren inguruan sortzen diren buloak geldiarazteko, eta Eva Caballerok Radio Euskadin zuzendu eta aurkezten duen La Mecanica del Caracol dibulgazio-saioko komunitate zientifikoaren laguntza ere badu. Gainera, EiTBk erabiltzaileen abisuak jasotzen ditu, 600 900 454an, alegia, #Koronabuloak ekimeneko WhatsApp zenbakian.

Nos estáis preguntando por un whatsapp que está circulando, que adelanta medidas que va a adoptar el Gobierno Vasco como consecuencia del incremento de casos por #COVID19.

No hay nada oficial aún sobre medidas a adoptar. pic.twitter.com/SpJPDVXiM2

— VOSTeuskadi (@VOSTeuskadi) August 13, 2020