21era igo dira Gasteizko Xixilu jatetxeko positiboak

Osasun Sailak emandako datuek, foku posibleekin egiten ari diren behaketen arabera, Galdakaoko Muguru tabernarekin harremana duten positibo kopuruak seikoa izaten jarraitzen duela diote, 1.105 PCR egin eta gero. Gasteizko Xixilu jatetxearekin zerikusia duten positiboak atzemateko, berriz, 912 proba egin dira eta 21era igo da kutsatutako bezeroen kopurua.

Lasarteko eliztarren kongregazio batean 81 proba egin ziren atzo eta guztiek emaitza negatiboa izan zuten. Hasiera batean negatiboa zen emakume erlijioso batek sintomak izan ditu eta positiboa izatera pasa da.

Barrikako (Bizkaia) Golfo Norte ostalaritza-establezimendua ere itxi dute, bertako langileetako batek positibo eman ostean, sare sozialen bidez jakinarazi dutenez.

EAEn, 265 positibo atzeman dituzte azken 24 orduetan PCR proben bidez. Kasu berrietako 180 Bizkaian atzeman dituzte, 44 Gipuzkoan eta 35 Araban. Horrez gain, EAEtik kanpo bizi diren sei pertsonak positibo eman dute azken orduetan.