Zubia: "Pertsonen arteko harremanak ahalik eta gehien murriztu behar ditugu"

Covid-19ari aurre egiteko, ez zaio behar beste garrantzia eman kontaktuak murrizteari, eta eskuak garbitzeak, musukoa janzteak eta distantzia soziala mantentzeak bezainbeste balio du. Hala esan du, Euskadi Irratiko 'Osasun Etxea' saioan, Felix Zubia Donostia Ospitaleko Zainketa Berezien Unitateko medikuak, eta berandu baino lehen, norberak bere harreman sarea murriztu behar duela nabarmendu du. Herritarrei helarazi zaien mezua ez dela "guztiz zuzena"  izan uste du.

Positiboen goranzko joerak jarraituz gero, "laister egoera lehertuko da eta neurri zorrotzagoak beharko dira, bai ala bai", esan du Zubiak Euskadi Irratiko Osasun Etxea saioan. Espazio itxietan eta jende asko pilatzen den lekuetan arreta jarri behar dugu gaitza horrelako egoeretan zabaltzen delako, Zubiaren hitzetan. 

Beste konfinamendu bat gertu ikusten duen galdetuta, erantzuna argia izan da: "Osasun sistemak gainezka egiten badu, ez dago beste biderik. Aurrekoan ere horregatik erabaki zen konfinatzea, eta oraingo datuak ez dira onak. Gora goaz modu esponentzialean, denbora gutxian bikoiztu egin du kutsatuen kopurua. Bigarren olatua edo nahi duzun izena jarri, baina egoera larria da eta neurriak zorroztu egin beharko dira".

Neurriak hartzen "norberarengandik" hasi behar dugula esan du, "beti pentsatzen baitugu gaizki ari dena bestea dela". " Fokua denon jokabide orokorrean jarri behar dugu", gaineratu du.