Gizartea
KORONABIRUSA
Negatibo eman dute Zizurkilgo bizilagunei atzo egindako probek
AGENTZIAK | ERREDAKZIOA
Positiboak Aurrera plazako 1 atariko bi pisutan atzeman zituzten; beraz, eraikinean bizi ziren guztiak isolatu zituzten.
Zizurkilgo (Gipuzkoa) etxebizitza bloke bateko 60 egoiliarrei ostegun honetan egindako PCR testek emaitza negatiboa eman dute, beraz, bizilagun horiek "ohiko bizimoduarekin" jarraitu ahal izango dute, Udalak jakinarazi duenez.
Udalak argitu duenez, bi pisutako bizilagunak baino ez dute positibo eman covid-19an Aurrera plazako 1 zenbakian dagoen higiezin horretan. Bizilagunen kasu horien ondorioz egin zizkieten probak gainerako bizilagunei, eta horiek etxean isolatuta jarraituko dute.
Udalak bizilagun guztien jarrera eskertu du, eta, aldi berean, udal zerbitzuak isolamendu egoeran jarraituko duten kaltetuekin etengabeko harremanetan izango direla iragarri du.
Osasun agintariek bigarren aldiz isolatu dute eraikin bat Gipuzkoan aste honetan, joan den asteleheneko azken orduan Eusko Jaurlaritzako Osasun Sailak Hernaniko Udalari herriko eraikin oso bat konfinatzeko eskatu ostean.
Hala ere, asteazken goizean kautelazko neurri hori bertan behera utzi zuten, etxebizitzako bizilagunen artean egindako PCR probetan ez baitzen kasu positiborik atzeman.
