Gizartea
Koronabirusa
Hernanin konfinatuta zeuden bizilagunek negatibo eman dute PCR probetan
eitb.eus
Hernaniko Udalak gaur goizean altxatu du herriko etxebizitza eraikinean ezarritako isolamendua, proben emaitzak ezagutu eta gero.
Hernaniko Udalak (Gipuzkoa) bertan behera utzi du herriko etxebizitza-eraikinean ezarritako isolamendua gaur goizean, egindako 35 PCR testek ez baitute atzeman COVID-19 kasurik bizilagunen artean. Bizilagunen artean hainbat positiboren susmoa zegoelako isolatu zituzten.
Udalak ohar baten bidez jakinarazi duenez, "atzo egindako froga guztiak negatiboak izan direnez, eraikinaren isolamendua altxatu egin da".
Erakunde bakar batek ere ez zuen balizko kaltetuen kopuruari buruzko daturik eman nahi izan, baina Nekane Murga Eusko Jaurlaritzako Osasun sailburuak atzo esan zuenez, guztira hamar familia ziren kaltetuak.
Estibalitz Aldeiturriaga Hernaniko alkateordeak adierazi zuenez, asteleheneko 20:30ak aldera izan zuen Udalak egoeraren berri, Osasun Saila Udalarekin harremanetan jarri zenean, "etxebizitza batean kasu positibo batzuk zeudela eta eraikina konfinatu behar zela baieztatzeko".
Aldeiturriagak zehaztu zuenez, komunikazio horren ondoren, Udaltzaingoa eta Babes Zibila "Osasun Sailarekin koordinatuta jarri ziren, eta eraikina konfinatu" zuten, bizilagunei egingo zitzaizkien PCR testen emaitzak izan arte.
Egun oso bat isolatuta igaro ondoren, emaitza negatiboak gaur goizeko lehen orduan ezagutu dira, eta horri esker etxebizitza-bloke horren konfinamendua altxatu ahal izan da.
