Urkulluk kezka helarazi dio Erresuma Batuari berrogeialdia derrigortzeagatik

Iñigo Urkullu jarduneko lehendakariak Hugh Elliot Erresuma Batuko enbaxadoreari jakinarazi dio kezkatuta dagoela Espainiako Estatutik doazen bidaiariei ezarritako berrogeialdiagatik, autonomientzat izan dezakeen eragin dela eta, alde batera uzten baitu birusak horietako bakoitzean duen eragina.

Josu Erkoreka Eusko Jaurlaritzako jarduneko bozeramaileak atzo Urkulluk eta Elliotek izan zuten telefono bidezko elkarrizketaren berri eman du. Azaldu duenez, bertan lehendakariak diplomatikoari helarazi zion erabaki horrek EAEn izan dezakeen eraginaz harago, Erresuma Batuak ez duela kontuan hartu koronabirusak ez diela berdin eragiten erkidego guztiei.

"Ez zaigu zuzena iruditzen autonomia-erkidego guztietan egoera epidemiologikoki berdina dela pentsatzea", adierazi du.

Haren ustez, "agerikoa" da egoera "desberdina" dela eta osasun publikoaren kudeaketa ere "modu deszentralizatuan" egiten ari dela. "Bereizketarik gabe hartutako erabakia da, autonomia-erkidego guztiak egoera berean daudela ziurtzat ematen duena, eta ez du oinarri objektiborik eta zentzuzkorik", gaineratu du.