Gizartea
KORONABIRUSA
Ipar Euskal Herrian derrigorrezkoa da jada maskara leku itxietan erabiltzea
AGENTZIAK | ERREDAKZIOA
Zehazki, denda, supermerkatu, banku eta azoka estalietan beharrezkoa da maskara. Zinema aretoetan, ordea, maskara ez da derrigorrezkoa izango behin aretoan eserita.
Ipar Euskal Herriko bizilagunek maskara jantzita eraman behar dute jada publiko orokorrarentzako espazio itxietara sartzeko. Izan ere, astelehen honetatik derrigorrezkoa da jada musukoa erabiltzea, koronabirusa zabaltzea saihesteko.
Zehazki, denda, supermerkatu, banku eta azoka estalietan beharrezkoa da maskara. Zinema aretoetan, ordea, maskara ez da derrigorrezkoa izango behin aretoan eserita. Bai antzokietan, bai hitzaldi aretoetan neurri bera aplikatuko da oraingoz.
Leku publiko itxietan maskara ez eramateagatik 135 euroko isuna jarriko dutela iragarri dute Frantziako agintariek.
Jean Castex Frantziako lehen ministroak ostegunean jakinarazi zuen neurria hasieran aurreikusitakoa baino astebete aurreratzeko erabakia hartu dutela. Senatuan bere gobernu programa azaltzeko egindako agerraldian, neurria ahalik eta azkarren aplikatzeko premian justifikatu zuen gobernuburuak neurria azkartzea.
Egun bat lehenago, Batzar Nazionalaren aurrean, Castexek berak abuztuaren 1a ezarri zuen betebehar hori indarrean jartzeko azken eguna, Emmanuel Macron presidenteak uztailaren 14ko jai nazionalaren harira emandako elkarrizketan agindutakoa.
Gobernuak neurri hori hartzeko orduan azkartzea behar zuela ziurtatu zuen Castexek, eta abuztuaren 1eko data "berandu" zela bere ustez.
Presidenteak asteartean ziurtatu zuen birusaren zirkulazioak gora egin zuela herrialdean, eta, horregatik, leku publiko itxietan maskara eramatera behartzeko eskatu zion Gobernuari.
Frantziak izurritearen agerraldi berriak atzeman ditu, Mayenne departamenduan bereziki, herrialdearen ipar-mendebaldean, 100.000 biztanleko 50 kutsatuko tasa gainditu baita.
Gobernuaren ordezkaritzak maskararen derrigortasuna ezarri du leku itxi guztietan, saileko sei udalerritan, eta, aldi berean, test-kanpaina bat abiarazi du, infekzio-fokuak isolatzen saiatzeko.
Hori dela eta, toki publiko itxietan maskara eramateko betebeharra ezarri dute agintariek, herrialde osoan zabaldu arte itxaron gabe.
