Gizartea
Koronabirusa
"Ez dago San Fermin jairik, eta ez litzateke ekitaldi paralelorik egin behar"
agentziak | erredakzioa
Maria Chivite Nafarroako presidentearen eta Enrique Maya Iruñeko alkatearen deia da hori, Euskal Herriko jai ospetsuenak bertan behera geratu direla eta.
Aurten "ez dago San Fermin jairik, eta ez litzateke ekitaldi paralelorik egin behar", adierazi dute Maria Chivite Nafarroako Gobernuko presidenteak eta Enrique Maya Iruñeko alkateak. Elkar hartuta atera dira gaur prentsaurreko batera mezu hori zabaltzeko, eta "jaiak antolatzen eta ez antolatzen onenak" direla erakusteko unea iritsi dela azpimarratzeko.
San Fermin jaiek mundu mailan duten ospea dela eta, litekeena da begirada asko Nafarroako hiriburura begira jarrita egotea uztailaren 6tik 14ra, eta, hori dela eta, "prebentzio eta kontzientzia sozialaren mezua" indartzeko "aukera paregabea" dela azaldu dute.
"Ez-sanferminak" agerian uzteko, neurriak hartuko dituzte; besteak beste, ez dute garraio publikoarentzat eta ostalaritzarentzat ordutegi berezirik jarriko, eta aforoa zainduko dute egun eta leku garrantzitsuenetan.
Gobernuak eta Udalak "bat egiten" duten erabakia dela nabarmendu du Foru Gobernuko presidenteak, Udala baita jaien gaineko eskumena duena. "Gobernuak ezin du jaien debekuan sartu, udalen eskumen hutsa direlako, baina gure erantzukizuna udalei laguntzea izan behar dela uste dugu", azpimarratu du Chivitek.
Nafarroako presidenteak azaldu duenez, Gobernua Iruñeko Udalarekin dago, "bere erabakia indartzeko, batez ere osasun publikoaren ikuspegitik eta pertsona ahulenen babesaren ikuspegitik".
Egun horiek "urteko beste edozein egunen ahalik eta antzekoenak izatea lortu behar dugu", adierazi du Chivitek.
Hala, horren hitzetan, "aurten ez dago San Fermin jairik, eta ez litzateke ekitaldi paralelorik egin behar; izan ere, jai herrikoirik ez egoteko arrazoia osasuna eta bizitza babestea da".
Ildo beretik, Enrique Maya Nafarroako hiriburuko alkateak nabarmendu du uztailaren 6an, 12:00etan, Nafarroako hiriburua "munduaren erdigunea" izango dela, eta "egoera gogor baten aurrean erantzuten" duela erakusteko deia egin du.
Gainerako udalerrientzat ere "eredu" izatea eskatu die herritarrei, "Iruñean egiten dena Nafarroako beste leku batzuetara ere eraman baitaiteke", eta horietan ere "kezka" dago ekitaldi paraleloen balizko ospakizunen inguruan. "Hemen bota dezakegun mezua jai guztietarako bota behar den mezu bera da", komentatu du.
Gainera, Mayak salatu du "nolabaiteko pertzepzio soziala" dagoela koronabirusa jada iragana dela, eta argi utzi nahi izan du ez dela horrela eta COVID-19 "oraina" dela. Hori dela eta, "gauzak ondo egin behar ditugu, leku batzuetan sortu diren agerraldi horiek berriro ez gertatzeko", gaineratu du.
Peñek ez dute deituko eta ez dute parte hartuko
Peñek ez dute ekitaldirik deituko sanferminetan, eta ez dute parte hartuko jende pilaketak edo osasunerako arrisku-egoerak eragin ditzaketen jardueretan.
Hori dela eta, ez dute pankartekin desfilatuko, ez dute txarangen irteerarik egingo eta uztailaren 6tik 14ra ez dituzte euren egoitzak jendearentzat irekiko, Imanol Azkona Iruñeko Peñen Federazioko presidenteak eta Lorea Irisarri Federazioko Talde Feministako arduradunak prentsaurrekoan jakinarazi dutenez.
Federazioak ostiral honetan esandakoaren arabera, "bizitako egoera, ezohikoa izateaz gain, edozein erabaki lasai, patxadaz eta erantzukizunez hartzeko bezain gogorra izan da, presarik eta antsietaterik gabe".
Pandemia garaian osasun arloko profesionalek, auzoko merkatariek eta gainerako langileek egindako lana txalotu dute peñek; izan ere, horri esker, "gogo handiagoz ospatu ahalko ditugu 2021eko sanferminak, eta horretarako prestatzen ari gara jada".
Azkonak prentsaurrekoan adierazi duenez, aurten peñek ezingo dute ohiko pankartekin kalera atera, baina horiek datorren astelehenetik uztailaren 23ra bitartean Baluarten egingo duten erakusketa batean ikusi ahalko dira.
Iruñeko taberna batzuek uztailaren 6an eta 7an ez irekitzeko hartutako erabakiari buruz, "oso erabaki ausarta eta oso arduratsua" dela adierazi dute, baina ireki nahi dutenak ez direla "kriminalizatu" behar adierazi dute.
