Mugikortasun librea, Euskal Herri osoan

Euskal Herrian mugikortasun osoa dago jadanik, eta bazter eta txoko guztietara joan daiteke. Nafarroan gauerdian amaitu da alarma egoera, eta Ipar eta Hego Euskal Herria banatzen dituzten mugak ere ordu horretan ireki dituzte.

Irun eta Hendaia lotzen dituen Santiago zubia da horietako bat; bi ordu lehenago zinta bat geratzen zen soilik Irungo aldean eta Hendaian zeuden hesiak pixkanaka kentzen hasi dira.

Bizilagunetako asko muga noiz irekiko zain zeuden, kasu askotan senide eta lagunak ia hiru hilabeteren ondoren bertatik bertara ikusi ahal izateko.

Honenbestez, normaltasun edo errealitate berria deitutakoa Euskal Herri osora gauerdiarekin batera iritsi da.

Euskal Autonomia Erkidegoan ostiralean amaitu zen alarma egoera, gaur amaitu da Nafarroan, eta Hegoalde zein Iparraldearen arteko mugan ere jada ez dago kontrolik.

Martxoaren 14an ezarri zuen alarma egoera Espainiako Gobernuak, herritarren mugikortasuna murriztuz. Bi egun geroago mugak itxi zituen. Orain, alarma egoera amaituta mugak ere ireki egin dituzte. Hasiera batean gaur gauerdian ziren irekitzekoak baina Espainiako eta Frantziako gobernuek mugaren irekiera egun bat aurreratzea adostu zuten.

Dagoeneko Frantziako jendarmeek eta Espainiako Poliziak ez dute paper berezirik eskatzen muga igarotzeko. Pirinio Atlantikoetako Prefeturak indarrean zegoen oharra aldatu eta egun bat aurreratu du mugaren irekiera.