Gizartea
Deseskalatzea
Nafarroako Gobernuak ostiralean onartuko ditu "normaltasun berriaren" baldintzak
AGENTZIAK | ERREDAKZIOA
"Normaltasun berriaren" aroa ekainaren 21ean hasiko da Nafarroan. Maria Chiviteren Gobernuak segurtasun neurriak betetzen segitzeko deia egin die herritarrei.
-
Iruñeko taberna baten barrualdea. Argazkia: EFE
Nafarroako Gobernuak ostiral honetan onartuko du "normaltasun berria" deitutako aroan betebeharreko baldintzak bilduko dituen dekretua. Nafarroa ekainaren 21ean, 00:00etan, sartuko da "normaltasun berrian".
Javier Remirez bozeramaileak azaldu duenez, Gobernuko departamentu ezberdinak eragile sozioekonomikoekin eta tokian tokiko erakundeekin harremanetan daude, "ahal den heinean irizpideak adosteko eta ‘normaltasun berrian’ sor daitezkeen arazoak aurreikusteko".
Epidemiaren egoera "ona" dela eta, ondorioz, deseskalatze prozesuan aurrera egiteko posible dela esan du, baina, hala ere, arduraz jokatzeko deia egin du.
"Egoerak hobera egin du, baina pandemia ez dugu gainditu eta gutako bakoitzaren esku dago osasun agintariek emandako gomendioak betetzea. Hori da izurritea gainditzeko bidea", azpimarratu du.
