Gizartea
Koronabirusa
EAEko herritarren % 10i egin dizkiete COVID-19a detektatzeko probak
Agentziak | Erredakzioa
Murgak ziurtatu duenez, euste-fasetik "zaintza aktiboko" fasera igaro dira Euskadin. Proben bitartez, foku berriak garaiz detektatu eta kontrolatu ahal izan dituzte.
-
Basurtuko ospitalearen Revilla pabilioia. Argazkia: EiTB.
Euskal Autonomia Erkidegoko biztanleen % 10i, hau da, 214.000 pertsonari baino gehiagori, egin dizkiete koronabirusa detektatzeko probak, pandemia hasi zenetik.
"Datu horrek erakusten du zaintza eta detekzio goiztiarra direla gure sendotasunik handiena", nabarmendu du prentsaurrekoan Nekane Murga Osasun sailburuak, eta azken orduetan Euskadin ez dela heriotza berririk izan jakinarazi du.
Murgaren hitzetan, birusaren euste-fasetik "zaintza aktiboko" fasera igarota, eta probak egiteari esker, garaiz detektatu eta kontrolatu ahal izan dituzte Basurtuko (Bilbo) eta Txagorritxuko (Gasteiz) ospitaleetan agertu diren foku berriak.
Emandako datuen arabera, PCR probaren bidez baieztatutako 13 kutsatu berri erregistratu dira azken orduetan, azken zenbaketan jakinarazitakoak baino 5 gehiago; sei Araban atzeman dituzte, bost Bizkaian eta bi Gipuzkoan.
