Hidroxiklorokinarekin egindako entseguekin berriro hasiko direla iragarri du MOEk

Hidroxiklorokinarekin egindako entseguekin berriro hasiko direla iragarri du Munduko Osasun Erakundeak (MOE) asteazken honetan. MOEk zehaztu duenez, saiakuntza horiek COVID-19aren aurkako txertoa topatzeko nazioartean egiten ari diren ahaleginen barnean daude.

MOEren kontrolpean, 35 herrialdetan ari dira egiten entsegu klinikoak, eta aditu-talde batek gainbegiratzen ditu. Aurreko astean, aditu-talde horrek gomendatu zuen, kontuz ibiltzearren, farmako horrekin lotutako saiakuntzak geldiaraztea; izan ere, informazio batek zalantzan jartzen zuen haren segurtasuna.

MOEren zuzendari nagusi Tedros Adhanom Ghebreyesusek esan duenez, "heriotza-tasari buruz eskuragarri ditugun datuak abiapuntu", adituek ondorioztatu dute ez dagoela arrazoirik entseguaren protokoloa aldatzeko: "Zuzendaritza Taldeak gomendioa jaso du, eta entseguaren adar guztiekin aurrera jarraitzea onartu egin du, hidroxiklorokina barne".

MOEren zuzendariak, baina, nabarmendu du Datuen Segurtasun eta Zaintza Batzordeak "gertutik" zaintzen jarraituko duela farmako guztien segurtasuna; orain arte, arestian aipatutako 35 herrialdetan, 3 500 gaixo bildu dituzte, Tedrosek jakinarazi duenez.

Kontinenteei erreparatuta, Amerikan daude COVID-19aren kasurik gehien: "Bereziki, Erdialdeko eta Hego Amerikako egoerak kezkatzen gaitu; izan ere, bertako herrialde askotan bizkortutako epidemiak ari dira sortzen. Halaber, ekialdeko Mediterraneoan, hego-ekialdeko Asian eta Afrikan gero eta kasu gehiago daude, nahiz eta kopurua askoz ere txikiagoa den", ohartarazi du Tedrosek.

MOEko zuzendariak, baina, gogora ekarri du Europan COVID-19ko kasuak behera egiten ari direla; asteartean, izan ere, martxoaren 22tik honako datuak kontuan izanik, kasu-kopururik txikienaren berri eman zuten.