Gizartea
Deseskalatzea
EAEko institutuen % 20 eta Lanbide Heziketako "ia zentro guztiak" ireki dituzte
Agentziak | Erredakzioa
Segurtasun-neurri zorrotzak aplikatu dira. Sindikatuak erabakiaren kontra daude, eta, irakasleen eta ikasleen osasuna babesteko, Eusko Jaurlaritzaren aurrean elkarretaratzea egin dute.
Euskadiko institutuen % 20k, gutxi gorabehera, eta Lanbide Heziketako "ia zentro guztiek" ateak ireki dituzte astelehen honetan, maila batzuetan aurrez aurreko eskolak emateko, sindikatuen iritzia kontrakoa bada ere. ELAk grebarako deia egin du, bai eta Ikasleen Sindikatuak ere. Hezkuntza Sailak, ordea, itzulera "segurua" dela azpimarratu du, eta hartu dituzten segurtasun-neurriak gogorarazi ditu: maskarak derrigorrezkoak dira, eta ikasleei tenperatura neurtu diete beharrezko kasuetan.
Zehazki, DBHko 4. mailako, Heziketa Profesionaleko eta Batxilergoko 85.000 ikasle itzuli dira aurrez aurreko eskoletara irekitzea erabaki duten ikastetxeetan, Jaurlaritzak erabakia hartzeko aukera ikastetxeetako zuzendaritzen esku utzi ostean.
Hezkuntza Saileko iturriek aditzera eman dutenez, "helburua ez da kuantitatiboa, kualitatiboa baizik. Helburua zailtasun gehien dituztenen ikasturtea salbatzea da, ez denak itzularaztea".
Jarduera maiatzaren 18an berrabiatzea aurreikusi zuen Jaurlaritzak hasiera batean, baina Hezkuntza Sailak atzera egin behar izan zuen, erabaki hori aurrera eramateko segurtasun juridikoa falta zitzaiolako. Aurrez aurreko heziketa deseskalatze-prozesuaren 2 faserako aurreikusita dago, eta EAE astelehen honetan sartu da fase horretan.
Hezkuntza Sailak zehaztu duenez, ondorengo egunetan gero eta handiagoa izango da jarduera presentziala hezkuntza-zentroetan, betiere lehentasuna eman dieten etapetan.
Prebentzio-neurriak
Eskola-ordutegian, maskara derrigorrez erabiltzea, mahaien artean 1,5 metroko distantzia gordetzea, sarrera eta irteera mailakatuak egitea, hidrogelak erabiltzea, garbitasuna indartzea eta termometroak erabiltzea dira zentroetan aplikatu diren neurrietako batzuk.
Gehienez ere 5 ordu eman dituzte ikasleek zentroan, ordutegi trinkoan eman dituzte eskolak eta ez da jantoki-zerbitzurik egon. Ikasgeletan ezin dira 15 ikasle baino gehiago bildu, eta aurrez aurreko eskolak eskola telematikoekin uztartu dituzte.
Pilaketak ekiditeko txandak
Txandak antolatu dira jolastokian, liburutegian, tailerretan, informatika geletan, laborategietan, eta gainerako espazio publikoetan, derrigorrezko 2 metroko distantzia errespetatu ahal izateko.
Zentro bakoitza izan da ateak irekitzeko erabakia hartu duena. Ikasle guztiak ez dira klasera itzultzera derrigortuta egon, ikastetxe askotan lehentasuna beharrizan handiena duten ikasleetan jarri baitute; selektibitatea prestatzen ari diren ikasleetan, esaterako.
Sindikatuak, kontra
Hezkuntza Sailak hartutako erabakiak ez du sindikatuen babesik. Sindikatuek gogor kritikatu dute ikasleen arteko ezberdintasunak ekiditeko irizpide bateratuetan oinarritutako neurrien falta.
Horrela, ikasleen eta irakasleen osasuna eta segurtasuna arriskuan daudela ikusiz gero, neurriak hartuko dituztela ohartarazi dute. ELAk, zehazki, greba deitu du, Ikasleen Sindikatuak bezala.
Sindikatuen elkarretaratzea Eusko Jaurlaritzaren aurrean
Testuinguru honetan, ELA, LAB, Steilas, CCOO eta UGT sindikatuetako ordezkariek elkarretaratzea egin dute Gasteizko Eusko Jaurlaritzaren egoitzaren aurrean, Hezkuntza Sailak gelak irekitzeko orduan izan duen inprobisazioa eta elkarrizketarik eza salatzeko.
"Hezkuntza Sailaren arduragabekeriaren eta irizpide aldakorren aurrean, ia ikastetxe guztiek bat egiten dute sindikatuek planteatutako ikasturte amaierako proposamenarekin", ziurtatu dute ohar baten bidez.
Era berean, sindikatuek adierazi dute erne egongo direla ikastetxeetarako itzulera osasun bermeekin egingo dela ziurtatzeko, bai ikasleentzat, bai irakasle eta gainerako langileentzat. Bestela, mobilizazioak antolatuko dituztela nabarmendu dute, "osasunerako bermeak egon arte".
Ikasturte amaiera honetan aurrez aurreko prestakuntzara itzultzeari buruz, Eusko Jaurlaritzak "alde bakarreko erabakiak" hartu dituela kritikatu dute, eta, esan dutenez, "sindikatuen zein hezkuntza-komunitate osoaren arbuio eta presioak Hezkuntza Sailak hasiera batean hartutako erabakiak aldatzera behartu dute".
Horrez gain, ikastetxe "askok" oraindik ez dutela Hezkuntza Ikuskaritzaren erantzunik jaso salatu dute: "Beraz, ez dakite euren planak Sailaren oniritzia duenik ere".
Datorren ikasturteari begira, ELAk, LABek, Steilasek, CCOOk eta UGTk sindikatuekin "negoziatzea eta adostasun batera heltzea" exijitu diote Hezkuntza Sailari, beharrezko plangintza bat eta segurtasun zein osasun neurriak eta protokoloak adosteko beharrezkoa baita, haien aburuz.
Uriarte: "Ikasgeletarako itzulera normaltasunez igarotzen ari da"
Cristina Uriarte Hezkuntza sailburuak adierazi duenez, Lanbide Heziketako eta institutuetako eskola presentzialak "normaltasunez" eta "beharrezko segurtasun neurriekin" itzuli dira.
Sailburuak azaldu duenez, astelehenetik aurrera klasera deitutako ikasleak "laguntza behar" dutenak dira, ziklo-aldaketa dakarten edo titulazio bat izateko eskubidea ematen duten ikastaroetan daudelako.
"Benetan beharrezkoa da ikastetxeetara itzultzea", bi hilabete eta erdi eskola telematikoak eman ostean: "Batzuek online jarraituko duten arren, uste dugu ikasturte-amaieran presentzialtasun horri bultzada ematea oso ondo etorriko zaiela askori", babestu du.
Uriartek eskertu egin du irakasleek eta familiek konfinamenduan egin duten "ahalegina", eta adierazi du klasera itzultzeko lehen eguna "normaltasunez" igarotzen ari dela eta ikastetxeetan "beharrezko segurtasun-neurriak" hartu dituztela.
Gainerako ziklo eta mailetako langileak, ekainaren lehen astean berriro lanera
Beraz, Batxilergoan, LHn eta DBHko 4. mailan astelehen honetan hasi dira berriro eskolak, zentro batzuetan behintzat; Eusko Jaurlaritzak larunbatean argitaratutako aginduaren arabera, ekainaren lehen astean gainerako ziklo eta mailetako langileak bueltatuko dira lanera, bai irakasleak, bai gainerako langileak, hezkuntza-zentroetan hezkuntza-jarduera gauzatzeko.
Erregimen Bereziko Irakaskuntzei dagokienez, hau da, hezkuntza artistikoei, kirol-hezkuntzei eta hizkuntzei dagokienez, gradu eta modalitate guztietan, zentro, eskola edo kontserbatorio bakoitzak bere programazioaren arabera abiaraziko du berriro hezkuntza- eta prestakuntza-jarduera, orain arte egin ezin izan dituzten jarduera espezifikoetarako: adibidez, ebaluazioetarako, ikasketa-amaierako lanetarako, eta sarrera-probetarako.
Astelehen honetan, halaber, euskaltegietan eta prestakuntza-akademietan, eskoletan eta zentroetan baimenduta dago hezkuntza- eta prestakuntza-jarduera, zentro publiko zein pribatuetan. Aginduak, halaber, ezarrita du azterketa ofizialak deitu eta egin ahal izango dituztela; besteak beste, euskara-maila egiaztatzeko HABEren azterketak.
