Renfek alarma-egoera ezarri baino lehenagoko zerbitzua berrezarri du Bilbon

Renfe ohiko jardunera itzuli da gaur, astelehena, Bilbon. Horrenbestez, alarma-egoera ezarri baino lehenagoko zirkulazio mailara itzuli da C1 (Bilbo-Santurtzi), C2 (Bilbo-Muskiz), C3 (Bilbo-Urduña) eta C4 (Bilbo-Balmaseda) lineetan.

Koronabirusaren pandemiak ekarritako alarma-egoera ezarri zenetik, aldirietako zerbitzuak Espainiako Gobernuak xedatutako mugikortasun egoeretara egokitu ditu Renfek.

Ohiko jarduna pixkanaka berreskuratu eta gune bakoitzeko eskarira moldatu, jende pilaketak saihestu eta bidaiarien arteko segurtasun-distantzia bermatuko da.

Era berean, Renfek maiztasuna areagotuko du, bereziki lanegunetan, bidaiarien mugikortasuna bermatzeko.

Datozen egunetan, Renfek informazio kanpaina bat jarriko du martxan, agertoki berri honetan osasun agintariek garraio publikoan bidaiatzeko emandako gomendioak jakinarazteko.

Kanpainaren leloa "Gero eta gertuago egotea zure esku ere badago" da, eta tren eta geltokietako euskarrien eta komunikabideen bitartez hedatuko da.

Alarma-egoerak iraun duen asteetan, aldirietako guneetan eskariak behera egin du % 80 eta % 90 artean, 2019. urteko sasoi berean izandakoekin alderatuz gero. Zerbitzuen okupazioa gune batzuetan % 15 ingurura iritsi da puntako orduetan, baina, oro har, eguneroko batez besteko okupazioan maila baxuak erregistratu dira.

Zerbitzuan normaltasunera bueltatzeko ezinbestekoa da distantzia sozialeko neurriei eustea, eta hori bidaiari bakoitzaren funtsezko ardura da, erakundeen eta enpresa publikoen kolaborazioarekin aipatutako distantzia hori bete ahal izateko.