Bizkaiak hondartzen erabilera maiatzaren 11tik aurrera adostuko du

Unai Rementeria Bizkaiko ahaldun nagusiaren ustez, "arraroa" da Gobernu zentralak neurriak probintziaka hartu nahi izatea, eta iragarri du datorren maiatzaren 11tik aurrera Aldundiak Bizkaiko hondartzen erabileraren inguruan "erabakiak" hartuko dituela.

Bizkaiko adinekoen egoitzei dagokienez, Rementeriak adierazi du Aldundiak "15 egunean behin" heriotzen kopuruaren berri emateko irizpideari eutsiko diola, eta horrekin beste egoiliar batzuei kopuruak ezagutzeak eragin diezaiekeen "izua" saihestu nahi duela.

SER irratian egindako elkarrizketa batean, Rementeriak azaldu du "bitxia" dela Gobernuko presidenteak atzo probintziaka, "gure kasuan lurralde historikoka", etxealdiaren malgutzea iragarri izana; izan ere, "Pedro Sanchezek berak adierazi zuen bezala, birusak ez du muga geografikorik ezagutzen", eta, haren ustez, alarma-egoeraren neurriak lasaitzeko "datu epidemiologikoak behar dira", eta "autonomia-erkidegoek dituzte".

"Zergatik probintziaka, eta ez metropoli eremuka edo eremu epidemiologiko konplexuka", galdetu du.

Era berean, gogorarazi du Bizkaiko Aldundiak ez duela Osasun Sailaren eskumenik, eta uste du egokiena dela Espainiako Gobernuak autonomia erkidegoetako Osasun sailekin "elkarlanean" aritzea etxealdia malgutzeko.

"EAJk eskua luzatu du beti, eta lehendakariak fede onez jokatzen du. Denok norabide berean egiten dugu arraunean, baina ondo egiteko elkarlana funtsezkoa da", gaineratu du Bizkaiko ahaldun nagusiak.

Aldundia eskuduna den honetan, Bizkaiko hondartzen kudeaketan, Rementeriak foru erakundea maiatzaren 11tik aurrera hareatzen erabilerari dagokionez "erabakiak" hartuko dituela aurreratu du, edukiera eta mareak kontuan hartuta, besteak beste.

Rementeriaren ustez, hondartzak erabiltzeari buruzko egungo zalantzak "erabaki zentralizatuen beste adibide bat dira", eta azpimarratu du itsasaldien eraginaez dela berdina Mediterraneoan edo Kantauri itsasoan.