MMS edo sodio kloritoak ez du koronabirusa sendatzen, eta arriskutsua eta ilegala da

Bideo batean koronabirusa 24 ordutan osatzeko sendagai gisa aurkeztu duten MMS (Miracle Mineral Solution – Soluzio Mineral Miragarria) edo sodio kloritoak ezein gaitzi aurre egiteko balio duela esateko ebidentzia zientifikorik ez dago. Poliziak ohartarazi du substantzia arriskutsua eta legez kanpokoa dela, Kataluniako Medikuen Elkargoak salaketa jarri du horren sustatzaileen aurka eta Fiskaltzak ikerketa ireki du.

Dolça Revolució (Iraultza Gozoa) kooperatibaren sustatzailea den Josep Pàmies kataluniar nekazariak bideo bat aireratu zuen YouTube atarian, MMS edo sodio kloritoak hainbat gaixotasuni, COVID-19ari, besteak beste, aurre egiteko dituen ezaugarrien berri emateko. Bideoa, baina, oraintsu kendu ante. Produktu horren sustatzaileen arabera, propietate miragarriak ditu, eta hori hartzeko aholkua ematen dute, hainbat gaitz sendatzeko gai delakoan.

Hala ere, EiTBk egunotan koronabirusaren inguruko albiste faltsuak gezurtatzeko lankide duen Maldita.es atariak Maldito Bulo atalean argi utzi duenez, "ez dago probarik" sodio kloritoak COVID-19ari aurre egiteko balio duela esateko. Maldita.es atariarekin ez ezik, VOST Euskadirekin eta Eva Caballerok Radio Euskadin duen La Mecánica del Caracol dibulgazio saioko komunitate zientifikoarekin ere ari da EiTB elkarlanean zurrumurru horiei aurre egiteko.

Maldito Bulon azaldu dutenez, "MMS, Miracle Mineral Solution edo Miracle Mineral Suplement (osagarri edo soluzio mineral miragarria) ingelesezko hitzen siglak, sodio kloritoaren ur-disoluzioa", papergintzan eta ehungintzan erabiltzen dute zuritzaile gisa, eta, "neurri txikitan, ura edangarri bihurtzeko erabiltzen den konposatuetako bat da". Gainera, ez da ageri koronabirusari aurre egiteko ikertzen ari diren botika eta tratamenduen artean.

Kataluniako Medikuen Elkargoaren salaketa

Kataluniako Medikuen Elkargoen Kontseiluak salaketa jarri ondoren, Kataluniako Fiskaltza Nagusiak ikerketa egiteko izapideak abiatu ditu Josep Pamiesen eta Dolça Revolució kooperatibaren aurka, sodio kloritoa sustatzeagatik koronabirusari aurre egiteko tratamendu gisa.

Kataluniako Medikuen Elkargoen Kontseiluak salaketa jarri du osasun publikoaren kontrako ustezko delitu bat eta publizitate engainagarriagatik beste bat egotzita, koronabirusari aurre egiteko sodio kloritoaren ustezko egokitasuna sareetan zabaltzeagatik, medikuen ordezkariek komunikatu baten bidez jakinarazi dutenaren arabera.

El Consejo de Colegios de Médicos de Cataluña denuncia a Josep Pàmies por promover el producto MMS como tratamiento de la #COVID19 en plena emergencia sanitaria#CCMC @COMBarcelona @COMGirona @comtgna @COMLLEIDA https://t.co/KaZXaaAdJ2 pic.twitter.com/ygdohkrkOE

— Col·legi Metges BCN (@COMBarcelona) April 3, 2020

"Josep Pamiesek, osasun alorrean baliozkotutako titulaziorik edo medikuntza ezagutzarik gabe, banalizatu egiten du, bere webean eta sare sozialetan, COVID-19ari buruz eta MMS produktuaren ustezko egokitasunari buruz", medikuen kontseiluaren esanetan.

Kontseiluaren arabera, bide ezberdinetatik eta Kataluniako Ikus-entzunezkoen Kontseiluak egin berri duen txosten baten bidez izan du gertakari horien berri, Pamiesi eta Dolça Revolució kooperatibari delituak egozteko nahikoak izan daitezkeenak.

Horren iritzian, Josep Pamiesek mezu engainagarri hori zabaltzeko bideoa Youtube plataformatik kendu badute ere, egileak hori sustatzen jarraitu du Dolça Revolució kooperatibaren bitartez.

Bideoan, "koronabirusaren aurkako konponbidea duela esaten ausartzen da Pàmies", eta onartu egiten du debekatuta dagoela MMSa botika gisa saltzea, baina ez desinfektatzaile gisa, eta herritarrei dei egiten die Dolça Revolució kooperatibarekin harremanetan jartzeko produktua eskuratze aldera.

Poliziaren arabera, arriskutsua eta legez kanpokoa da

Apirilaren 5ean, pandemiaren jarraipena egiteko batzordearen bileraren ostean, Espainiako Polizia Nazionaleko Logistika eta Berrikuntza Saileko zuzendariorde nagusi José García Molina, besteak beste, MMSari buruz aritu zen, eta gezurtzat jo zuen soluzio mineral miragarri horri buruzko informazioa. "Albiste faltsua da" eta herritarren artean "izua zabaldu besterik ez du nahi", horren hitzetan. "Horren kontsumoa arriskutsua da, eta legez kanpoko substantzia da", gaineratu zuen.

Hona hemen prentsaurrekoaren une jakin hori, Javier Pereira "Wicho" dibulgatzaile zientifikoak zabaldutakoa:

El comisario principal de @policia D. José García Molina deja claro que el MMS que quieren colar Josep Pàmies y compañía como cura para la COVID–19 no sólo no cura nada sino que además es peligroso e ilegal. Es difícil decirlo más claro. pic.twitter.com/4qTZxy6OWA

— Wicho, parapetado en la ciencia @ 127.0.0.1 (@wicho) April 5, 2020

Hamarkada bat malaria, ebola eta autismoa ere "sendatzen"

Fernando Frías dibulgatzaileak orain urtebete Naukasen gogoratu zuen bezala, Botiken eta Osasun Produktuen Espainiako Agentziak duela 10 urte "ohartarazi zuen «MMSa» legez kanpoko botika dela, baina orain arte horren saltzaileek erabateko inpunitatearekin eta inork molestatu barik aritu dira". Urte horietan, malaria, ebola eta autismoa sendatzeko balio zutela esan zuten. Pamiesek MMSa autismoa sendatzeko metodo gisa aurkezteko eman behar zuen hitzaldi baten harian egin zuen Friasek artikulu hori, gaixoen senideen elkarteen protesten aurrean aipatu hitzaldia bertan behera utzi eta gero.

Post berean, Pàmiesi eta horren elkarte-kooperatibari ezarritako isun handiak gogoratu zituen Friasek. Generalitateak 600.000 euroko isun bat jarri zion Pamiesi, "helburu sendagarriak dituzten eta sendagai gisa baimenduta ez dauden produktuak publikoari zuzenduta sustatu, publizitatea egin eta zabaltzeagatik".