Gizartea
Koronabirusa
Nafarroak erositako osasun materiala garraiatzen zuen hegazkina atxiki du Turkiak
Agentziak | Erredakzioa
Javier Remirez Nafarroako Gobernuko bozeramaileak azaldu duenez, hegazkina Txinatik abiatu zen, eta Ankaran geldialdi tekniko bat egin behar zuenean, Turkiako agintariek atxiki dute.
-
Hegazkinak geldialdi tekniko bat egin zuen Ankaran eta bertan atxikitu dute. EiTBko artxibo irudia.
Javier Remirez Nafarroako Gobernuko bozeramaileak azaldu duenez, "kudeaketa ugari" egiten ari dira Foru Gobernuak erositako osasun materialez betetako hegazkina berreskuratzeko.
Remirezen esanetan, hegazkina Txinatik abiatu zen, eta Ankaran (Turkia) geldialdi tekniko bat egin behar zuenean, Turkiako agintariek atxiki dute. Iragan asteburutik dago bertan geldirik.
Nafarroako lehen lehendakariordeak nabarmendu du Espainiako Gobernua "kudeaketa" prozesuan laguntzen ari dela, eta arazo hau "lehenbailehen" konpontzea espero duela erantsi du.
Remirezek esan du azken hilabeteetan "merkatu bizian" murgildu, eta oztopoak sortu direla, baina horiek "konpontzeko zorian" daudela azpimarratu du.
