Gizartea
Trafikoa
Asteburuko joan-etorriak ekiditeko kontrolak egingo dituzte berriro
Agentziak | Erredakzioa
Ertzaintzak eta udaltzaingoek egingo dituzte. Konfinamendua ohiko bizitokian bete behar dela azpimarratu du Segurtasun sailak.
-
Bi ertzain, Donostiako irteera bateko kontrolean. ETBko bideo batetik ateratako irudia.
Ertzaintzak eta udaltzaingoek trafiko kontrolak egingo dituzte berriro ostiraletik igandera, errepideetan eta garraioetako geltokietan, EAEn bertan eta EAEtik kanpo dauden bigarren etxebizitzetara asteburuko joan-etorriak egitea ekiditeko. Joan-etorri horiek debekatuta daude koronabirusagatik bizi dugun alerta egoeran.
Konfinamendu neurriak ez betetzeagatik 600 eurorainoko zigorrak ezarri daitezke, Herritarren Segurtasunerako Legearen arabera, arau-hauste arinen kasuan, eta kopuru horretatik gora arau-hauste larrien kasuan, Segurtasun sailak aditzera emandakoaren arabera.
Prebentziorako kontrolen helburua, alarma egoeraren ondorioz mugikortasunari eta jarduerei jarritako murrizketak errespetatzea da. Gaur egun, lan egiteko edo oinarrizko jarduerak egiteko bakarrik zirkulatu daiteke leku publikoetatik. Oporretarako edo aisialdirako irteerak debekatuta daude, eta konfinamendua ohiko bizitokian bete behar da.
Hori dela eta, Ertzaintzak eta udaltzaingoak kontrolak egingo dituzte murrizketa horiek betetzen direla ziurtatzeko. Kontrolak errepideetan zein garraio publikoetako geltokietan egingo dira.
Errepideak ixteko aukera
Halaber, eta alarma eta osasun publikoko larrialdiari jarraituta, Ertzaintzak errepideak edo errepideetako tarte batzuk ixtea erabaki dezakeela azpimarratu dute, osasun publikorekin, zirkulazioaren segurtasunarekin edo murrizketekin zerikusia duten arrazoiak argudiatuta.
Era berean, gidariei euren joan-etorriaren justifikazio "zehatza, argia eta egiaztagarria" eskatu diezaiekete.
