Gizartea
KORONABIRUSA
13 heriotza izan dira EAEn azken orduetan, horietako bat Osakidetzako erizaina
AGENTZIAK | ERREDAKZIOA
Nafarroan aurretiazko patologiak zituen 86 urteko emakume bat da koronabirusak hildako bosgarren pertsona.
Albisteak (3)
EAEn 53 pertsona hil dira koronabirusaren ondorioz, azken orduetan 13 pertsona hil ondoren, horietako bat Bizkaian sei egun ospitaleratuta zeramatzan 52 urteko Osakidetzako erizain bat. Azken datuen arabera, 217 kasu berri erregistratu dira. Guztira, 1.190 positibo izan dira eta horietako 455 ospitalean daude, Nekane Murga Osasun sailburuak jakitera eman duenez.
Lurraldeka, Araban 621 positibo izan dira, eta horietatik 224 ospitaleratuta daude. Bizkaian, 393 pertsona kutsatu dira, eta horietatik 177 daude ospitalean. Azkenik, Gipuzkoan 176 kasu zenbatu dira, eta 54 daude ospitaleratuta.
Positibo eman zuten 18 pertsona sendatu direla nabarmendu ostean, Murgak 13 pertsona gehiago hil direla adierazi du. Zehazki, Araban 35 dira hildakoak, Bizkaian 13 eta Gipuzkoan 5.
Nafarroan aurretik patologiak zituen 86 urteko emakume bat da Covid-19ak hildako bosgarren pertsona, Nafarroako Gobernuko iturrien arabera.
Emakumea martxoaren 16an ospitaleratu zuten Tuterako Reina de Sofia ospitalean eta ostegun honetan hil da. Covid-19aren ondorioz Foru Erkidegoan hil diren beste lau pertsonak adinekoak ziren, Foru Gobernuak emandako datuen arabera.
Nafarroan koronabirusaz kutsatutako gaixoak 482ra igo dira, 132 ospitaleratuak eta 350 etxez etxeko jarraipenean. Zehazki, zainketa intentsiboetako unitatean Covid-19a duten gaixoetatik 11 ospitaleratuta daude.
