Verter Recycling enpresak aditu talde bat kontratatu du

Verter Recycling Zaldibarko zabortegiaren enpresa jabeak aditu talde bat kontratatu du. Teknikariak Eusko Jaurlaritzaren esanetara jarriko dituela iragarri du konpainiak, zabortegian aurrera eraman beharreko egitasmoak garatzeko, enpresak jakitera eman duenez.

Konpainiak ohar batean azpimarratu duenez, "ezbeharra gertatu eta aurreneko orduetan enpresako arduradunak desagertutako bi lankideen familiak artatzen saiatu ziren".

Aurreneko orduetan ezer egin ez izana justifikatu du enpresak: "larrialdi egoera bati aurre egiteko protokoloek markatu bezala, lehen lanak administrazioak abiatu zituen, Segurtasun Saileko Larrialdi Zuzendaritzaren zuzendaritzapean".

Salbuespeneko egoera bati aurre egiteko premiazko lanak izan ziren luiziaren ondorioz. Horrela, "aurreneko orduetan ez zuten ezer egiteko deitu", erantsi du konpainiak.

Iragan asteazkenean aurreneko bilera egin zuten enpresak eta Eusko Jaurlaritzako Ingurumen Saileko arduradunek. Bi aldeek ekintza zehatzak aurrera eramatea adostu zuten batzarrean.

Zentzu horretan, enpresak aditu talde bat kontratatu du. "Antzeko egoeratan ibilbide profesional luze eta egiaztatua dute", azpimarratu du konpainiak.

Teknikari taldea Eusko Jaurlaritzako Ingurumen Sailaren esanetara jarriko da, larrialdiaren kudeaketarako Batzorde Teknikoak zuzendu beharreko lanetan laguntzeko.

Era berean, Verter Recycling enpresa "Gobernuaren esanetara" jarri da. Larrialdi egoeraren lehen fasean koordinazio batzorde bat sortzea proposatu zuen Jaurlaritzak, lanak azkar aurrera eraman ahal izateko.

Gainera, Ingurumen Sailak eskatutako dokumentazioa ematen jarraitzen du enpresak, eskuragarri duen heinean.

"Joaquin eta Alberto aurkitzen laguntzeko lankidetzarako borondate irmoa une oro agertu du Verter Recyclingek, baita hondakinak kentzeko eta lurra egonkortzeko lanetan ere", nabarmendu du konpainiak.