Manifestazioa deitu dute Zaldibarko zabortegiaren luizia salatzeko

Herritar multzo batek manifestazioa deitu du biharko "Zaldibar argitu orain" lelopean Bizkaiko herri horretako zabortegian gertatutako luizia salatzeko.

Sare sozialetan zabaldutako deialdiaren arabera, mobilizazio zaratatsuak hiru zutabe izango ditu: 17:00etan Ermutik eta Eibartik bana aterako da, eta 16:30ean, beste bat Elgetatik. Hirurek Zaldibarko Eitzaga auzoan, Verter Recycling 2002 enpresak hondakindegia duen tokian, egingo dute bat.

Deitzaileek salatu dutenez, "lehentasuna langileak ateratzea izan beharrean, erantzule politikoen aurpegia garbitzea izaten ari da. Airearen kalitatea ona dela esaten badute ere, zabortegiak sutan darrai eta keak gure herriak estaltzen ditu. Azkenik, gertatutakoaren eta ondorioen azalpen argirik eman gabe jarraitzen dute".

Diotenez, "langileak, osasuna eta erantzukizunak" aldarrikatzeko unea da. Era berean, manifestazioa antolatzeko gaur arratsaldean bilera irekia antolatu dutela —Eibarko Arrate kultur elkartearen aretoan, 18:30ean— jakinarazi dute.

Euskal Herriko Eskubide Sozialen Kartak (ELA, LAB, Steilas eta beste sindikatu batzuek eta hainbat gizarte eragilek osatutakoa) bat egin du deialdiarekin.

Zaldibarren gertatutakoak erakusten du gure agintariek pertsonen, planetaren eta langileen bizitzaren gainetik jartzen dituztela beraien ezkutuko interesak. Biharko mobilizazioan parte hartzeko deialdia egiten dugu. Lan eta bizitza duinagatik, #ZaldibarArgitu pic.twitter.com/Hy7vAC23MQ

— U30GrebaOrokorra (@EskubideenKarta) February 14, 2020