Gizartea
Berdintasun lege berria
Jaurlaritzak indarkeria matxistaren biktimentzako laguntzak eta babesa indartu ditu
EITB.EUS
Berdintasun Legearen bigarren erreforma onartu du gobernu kontseiluak, eta, besteak beste, salerosketaren biktimei edo indarkeria ingurune batean bizi diren adingabeei aitortza egitea aurreikusten du.
Eusko Jaurlaritzak beharrezkotzat jotzen du berdintasun politikak eta indarkeria matxistaren biktima ezberdinentzako laguntzak indartzea. Helburu horrekin, 2005eko Emakumeen eta Gizonen Berdintasunerako Euskal Legearen bigarren aldaketaren lege proiektua onartu du gobernu kontseiluak asteon, eta hemendik aurrera Legebiltzarrera igorriko dute, tramitatu dezaten.
Gobernu kontseiluaren osteko prentsaurrekoan, Izaskun Landaida Emakundeko zuzendariak Josu Erkoreka bozeramailearekin batera egin du agerraldia, erreformak ekarriko dituen berrikuntza nagusiak azaltzeko. Landaidak espero du legea legegintzaldi honetan onartzea, nahiz eta hilabete gutxi geratzen diren amaitzeko.
Lege proiektuak emakumeen eta gizonen arteko desberdintasunari aurre egiteko neurriak jasotzen ditu, eta edukiaren zati handi bat indarkeria matxistari eskaintzen dio. Azken horri buruz, Landaidak nabarmendu du ahalegin handia egin dela "emakumeen eta gizonen arteko desberdintasunaren arazo sistemiko eta unibertsalaren barruan" kokatzeko, Istanbulgo Hitzarmenak legeak egiteko eskatu duen bezala.
Landaidak azaldu duenez, arau-testua hainbat eragilerekin adostu dute, eta 400 ekarpen jaso dituzte genero eta berdintasun arloko adituen, erakundeen, talde feministen eta indarkeria matxistaren biktimen arretarako profesionalen aldetik, besteak beste.
Aurreikusitako neurriak
- Indarkeria matxista mota guztien biktimei arreta emateko sistema zabaldu da. Hala, bikotekideak edo bikotekide ohiak edo familia barrukoak eragindako indarkeriaren eta sexu-indarkeriaren biktimez gain, sexu-esplotaziora bideratutako salerosketaren biktimak ere artatuko dira.
- Babes handiagoa ematen zaie indarkeria matxistaren ingurunean bizi diren adingabeei eta mendekotasuna duten beste pertsona batzuei. Legeak berariaz jotzen ditu indarkeria matxistaren biktimak eta bizirik atera diren biktimak. Gainera, seme-alaba umezurtzentzako laguntzak sortzen dira indarkeria matxistaren ondorioz.
- Biktimen erreparazio-eskubidea aitortzen da. Halaber, biktimentzat beste laguntza ekonomiko bat aurreikusten du, lehendik daudenekin bateragarria, ebazpen judizial bidez ezarritako kalte-ordainak ez ordaintzeko kasuetarako.
- Legeak, halaber, salaketaren zentraltasuna eta emakumeen aurkako indarkeriaren ikuspegi polizial-judiziala gainditzera jotzen du. Hala, neurrien erdigunean kokatzen dira biktimen eta biziraun dutenen eskubideak eta haien ahalduntzea, prozedura judizialarekin duten inplikazio edo lankidetza maila edozein dela ere.
- Legeak berdintasunari buruzko prestakuntza nahitaezkoa, progresiboa eta etengabea aurreikusten du administrazio publikoetako langile guztientzat. Bereziki, emakumeen aurkako indarkeria matxistaren aurreko erantzunean inplikatutako langileentzat, hasierako eta etengabeko derrigorrezko prestakuntza, alegia.
- Baliabide nahikorik ez dutela eta lana lortzeko zailtasun bereziak dituztela egiaztatzen duten biktimentzako laguntzak bermatu beharko dituzte euskal administrazioek. Halaber, baliabide publikoetan lehentasunezko tratua bermatu beharko dute gizarte- eta lan-orientaziorako eta prestakuntza-ikastaroak egiteko, eta administrazioek haien lan-kontratazioa sustatu beharko dute.
- Indarkeriaren detekzio goiztiarreko sistemak hobetzen dira, hezkuntza-, osasun-, polizia-, epaitegi-, lan- eta gizarte-arloko profesionalentzako protokolo eguneratuen bidez.
- Ikerketa areagotuko da, eta indarkeriari buruzko datuen erregistroa eta hedapena hobetuko dira. Berdintasun Behatokia sortzea ere planteatzen da, ikuspegi orokorra eta iraunkorra izatea ahalbidetuko duena.
- Debekatuta dago pertsonen sexuan oinarritutako diskriminazio oro, zuzenekoa zein zeharkakoa, edozein dela ere diskriminazio hori egiteko modua.
