Gizartea
COP25
Eusko Jaurlaritzak bat egin du 'Moving for Climate Now' proiektuarekin
Agentziak | Erredakzioa
'Moving for Climate Now' klima aldaketaz kontzientziatzeko enpresa, administrazio publiko eta irabazi-asmorik gabeko erakundeetako berrogeita hamar bat ordezkarik parte hartzen duten proiektua da.
-
Mugimendua Salamancan hasi eta abenduaren 1ean amaituko da Madrilen. Argazkia: EFE.
Elena Moreno Eusko Jaurlaritzako Ingurumen sailburuordeak bat egin du 'Moving for Climate Now' ekimenarekin. Proiektu horretan, enpresetako, administrazio publikoetako eta irabazi-asmorik gabeko erakundeetako berrogeita hamar bat ordezkarik parte hartzen dute, klima-aldaketari buruz kontzientziatzeko.
Exekutiboak jakinarazi duenez, parte-hartzaileek 500 kilometro egingo dituzte bizikleta elektrikoan Salamanca eta Madril artean, eta bertan manifestu bat emango diote Patricia Espinosa Nazio Batuen Erakundeko Klima Aldaketari buruzko Konferentziako presidenteari igande honetan, abenduaren 1ean, Klima Aldaketari buruzko Munduko Goi Bileraren testuinguruan.
Elena Moreno sailburuordeak bizikletaz egingo du azken etapa, Toledo eta Madril artekoa, eta manifestuaren irakurketan parte hartuko du. Krisi klimatikoari aurre egiteko, berotegi-efektuko gasen isurketak murrizteko eta Parisko Akordioa betetzeko gomendioak jasotzen dira dokumentu horretan.
'Moving for Climate Now' mugimendua Iberdrolak bultzatu du, eta Climate Leaders Awards sarietan saritu dute, aurten bosgarren edizioa bete duenean.
Bizikleta martxa hiri adierazgarri batetik abiatzen da 2015etik, eta Klima Aldaketari buruzko Goi Bilera egiten den hirian amaitzen da. Aurten, Salamancatik abiatu da, azaroaren 26an, eta Madrilen bukatuko da igandean, abenduaren 1ean.
