Gizartea
EMAKUNDEREN DATUAK
Askatasun sexualaren kontrako delituak %5,6 areagotu dira Euskadin
AGENTZIAK | ERREDAKZIOA
2019ko urtarriletik urrira, 339 emakumek salatu dute honelako erasoren baten biktima izan direla Araban, Bizkaian edo Gipuzkoan.
-
Indarkeria matxistaren kontrako kontzentrazioa Bilbon, 2019ko irailean. Argazkia: EFE
2019ko urtarriletik urrira, askatasun sexualaren kontrako delituren bat jasan dutela salatu dute 339 emakumek Euskal Autonomia Erkidegoan. Emakundek jaso dituen datu hauen arabera, %5,6 igo dira delitu hauek iaz epe berean izan ziren datuekin alderatuta.
Lurraldeka, Bizkaian %17,6 egin du gora emakume biktima kopuruak (153 izan ziren 2018an eta 180 2019n) eta Gipuzkoan %1,7 (115 2018an eta 117 2019an). Aldiz, Araban %20,7 jaitsi dira biktimak (53 2018an eta 42 2019an).
Oro har, urteko lehen hamar hilabeteetan, emakumeen askatasun sexualaren kontrako 341 eraso izan dira, iaz baino 5,56% gehiago (323 eraso).
Lurralde bakoitzean gertatu diren erasoen datuak egon diren biktima kopuruaren oso antzekoak dira: Bizkaian %18,2 igo dira, Gipuzkoan % 1,74 igo dira eta Araban %22 jaitsi dira.
----------------------------------------------------------------------------------------------------------------------------------------------------------------------------------------
Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak eta / edo deitu doako telefono hauetako batera: 900 840 111 (Euskadin) edo 016 (Estatu osoan). Lehenak arrastoa uzten du fakturan eta telefonoan; bigarrenak, telefonoan. Beraz, ez ahaztu ezabatzea.
