Gizartea
Elkarretaratzea
Ehunka euskaltzalek Nafarroako Gobernuari 'ausardia' eskatu diote Iruñean
eitb.eus
Kontseiluak deituta, euskalgintzak elkarretaratzea egin du Nafarroako Gobernuaren egoitza aurrean euskaldunon hizkuntz eskubideak berma daitezela aldarrikatzeko.
-
Ehunka euskaltzalek elkarretaratzea egin dute Iruñean. Argazkia: Kontseilua
Kontseiluak deituta, euskalgintzak elkarretaratzea egin du Nafarroako Gobernuaren egoitza aurrean, Nafarroako Auzitegi Nagusiak hartutako erabakiaren aurka protesta egiteko eta euskaldunon hizkuntz eskubideak berma daitezela aldarrikatzeko, "Berdintasuna, justizia eta kohesioa" lelopean.
Nafarroako auzitegiek administrazioaren kontratazioetan euskararen balioari emandako "kolpea" salatu eta Foru Gobernuari dekretuarekin aurrera egin dezan eskatu diote manifestariek, Kontseiluak Twitter sare sozialean azaldu duenez.
Kontseiluaren izenean hitz egin du Paul Bilbaok, esanez lehen helburua Euskararen Legea "aldatzea" dela eta horretan "tematuko" direla, epaiarekin gertatutakoa horren "ondorioa" delako. Aldi berean, Nafarroako Gobernuari "ausardia" eskatu dio Bilbaok.
Ehunka lagun bildu dira elkarretaratzean, "euskaldunontzat berdintasuna eta justizia" eskatzeko, gehiengo sindikalaren babesarekin. Nafarroa osoan euskararen ofizialtasuna aldarrikatu dute.
¿[#BEHINGOZ] ¿#EuskarazBiziNahiDugulako Elkarretaratzea. pic.twitter.com/S5agvVsrxg
— Kontseilua (@kontseilua) October 19, 2019
